Հիպերմարկետների «Կառֆուր» (Carrefour) ֆրանսիական ցանցը, որը Եվրոպայում խոշորագույնն է, իսկ աշխարհում՝ մեծությամբ երկրորդը ամերիկյան Wal-Mart-ից հետո, առաջին քայլն արել է Ֆրանսիայում` 1957 թ.: Առաջին հիպերմարկետը «Կառֆուրը» բացել է 1962 թ.: Եվրոպայում «Կառֆուրը» առաջատար դիրքեր գրավեց, երբ 2000 թ. ձեռք բերեց Promodes առևտրային ցանցը:
Ներկայում «Կառֆուրը» Եվրոպայի, Ասիայի, Աֆրիկայի և Հարավային Ամերիկայի շուրջ 35 երկրներում ավելի քան 15 հզ. 500 առևտրային կենտրոն ունի: Բացի համանուն բրենդով հիպերմարկետներից, «Կառֆուրի» առևտրային կենտրոնները ներկայացված են նաև Champion, Shopi և Marche Plus անվանումներով, փոքր խանութներով: Ընկերության գլխավոր բաժնետերերն են Halley Family Group-ը (13.03 %), Blue Capital S.a.r.l.-ը (9.09 %): 2012-ի վերջին քառորդում հիպերմարկետների ցանցի միջին շրջանառությունը կազմել է 22.85 մլրդ եվրո, իսկ տարեկան միջին առևտրաշրջանառությունը գնահատվում է շուրջ 100 մլրդ եվրո:
Ռուսական շուկայում «Կառֆուրի» ներկայացված լինելու մտադրության մասին 1990-ականներից շրջանառվող լուրերը հաստատվեցին 2009-ին. հունիսին առաջին կենտրոնը բացվեց Ռուսաստանի մայրաքաղաք Մոսկվայում, իսկ նույն տարվա սեպտեմբերին երկրորդ կենտրոնը՝ Կրասնոդարում, և մինչև տարեվերջ ընկերությունը ծրագրում էր բացել ցանցի երրորդ հիպերմարկետը՝ Լիպեցկում: Սակայն շուտով «Կառֆուրը», վաճառելով իր ակտիվները, հեռացավ ռուսական շուկայից՝ որոշումը հիմնավորելով հետագա աճի անհնարինությամբ: 2010-ի փետրվարին «Կառֆուր» հիպերմարկետները Ռուսաստանում վերջնականապես փակվեցին:
Դրանից որոշ ժամանակ անց լուրեր տարածվեցին, որ «Կառֆուրը» մտադիր է մուտք գործել վրացական շուկա. սկզբում ժամկետ նշվեց մինչև 2011 թ. վերջը, բայց նախապատրաստական աշխատանքները ձգձգվեցին, և առաջին ու առայժմ միակ կենտրոնը՝ մոտ 13 հզ. ք/մ տարածքով, բացվեց 2012 թ. սեպտեմբերին՝ Թբիլիսիում: Վրաստանում աճի հնարավորությունները, ըստ վերլուծաբանների, զգալի են: Մանրածախ ցանցն այնտեղ ներկայացված է մի քանի տեղական ցանցերով, որոնցից ամենամեծը՝ «Պոպուլին», միավորում է 45 սուպերմարկետներ, տնտեսության աճը տարեկան 6-7 % է, ներդրումային միջավայրը՝ բարենպաստ:
Ադրբեջանում «Կառֆուրն» առայժմ ներկայացված չէ:
Անցած տարի լուրեր տարածվեցին Հայաստան «Կառֆուրի» մուտք գործելու մասին: Նախ՝ նշվեց, որ առաջին հիպերմարկետը կբացվի մինչև 2012-ի վերջը, ապա տեղեկություններ եղան, որ տեղական օլիգարխիան է «ծառս եղել», և իշխանությունները խոչընդոտում են հիպերմարկետների մուտքին: Ոչ պաշտոնապես, սակայն շատ բազմիմաստ գրառում ի պաշտպանություն «Կառֆուրի Twitter-ում արեց ՀՀ-ում ԱՄՆ դեսպան Ջոն Հեֆերնը: «Կողմ» արտահայտվեց նաև ՀՀ վարչապետ Տիգրան Սարգսյանը: Ինքը՝ «Կառֆուրը» «Առաջին լրատվական»-ին պատասխանել էր, որ ուսումնասիրում է շուկան: Տեղեկություններ կան նաև, որ «Դալմա Մոլի» փոխարեն «Կառֆուրին» տեղ են հատկացնելու կինո «Հայրենիքի» շրջակայքում:
Ինչևէ: Հաշվի առնելով այն, թե որքան ժամանակ է հարկավոր եղել ռուսական և վրացական շուկաներ մուտք գործելու համար, հայաստանցիներիս մնում է զինվել համբերությամբ և սպասել:
