Աշխարհի ամենառիսկային մի քանի պետական վարկառուները հինգշաբթի շտապել են պարտատոմսեր վաճառել՝ ռեկորդային գլոբալ ցածր տոկոսադրույքների պայմաններում օգտվելով եկամտաբերության համատարած որոնումից։ Այս մասին գրում է The Wall Street Journal-ը։
Հայաստանը, Բուլղարիան և Էկվադորը պարտքի վաճառման հերթ են կանգնել, և չնայած թույլ վարկանիշներին ու նույնիսկ պարտքի չսպասարկման Էկվադորի վերջին փորձին՝ ներդրողներն ակնկալում են պարտատոմսերի լավ վաճառք։
Commerzbank-ի վերլուծաբան Սայմոն Կիխանո-Էվանսի խոսքով՝ այդ գործարքները լուրջ պահանջարկ կունենան վարձր լիկվիդայնության շնորհիվ։
«Աղբային» վարկանիշ ունեցող Հայաստանը ձգտում է 10 տարի ժամկետով դոլարային պարտատոմսերի թողարկման։ Գործարքի վրա աշխատող բանկիրները ենթադրում են եկամտաբերություն 7.625 տոկոսի շրջանում։ Երկիրը ձգտում է ստանալ 500 մլն դոլար։
Բուլղարիան, որը ըստ Fitch Ratings-ի՝ «աղբայինից» մեկ աստիճան վերև է գտնվում, ջանում է հասնել 3.1 մլրդ եվրոյի (3.28 մլրդ դոլարի)՝ 7,12 տոկոսով և 20 տարի մարման ժամկետով եվրոպարտատոմսերի թողարկմամբ։ Բանկիրները նախատեսում են, համապատասխանաբար, 2.2%, 2.7% և 3.25% եկամտաբերություն։
Ինչ վերաբերում է «աղբային» մակարդակում գտվող Էկվադորին, այն փորձում է վաճառել 5 տարի մարման ժամկետով դոլարային պարտատոմսեր մոտ 10.5 տոկոսի եկամտաբերությամբ։ Էկվադորը պարտատոմսերի շուկա է վերադարձել հունիսին՝ 2008 թվականին պարտքի դեֆոլտից հետո առաջին անգամ։
Զարգացող վարկառուները գլոբալ պարտատոմսային վաճառքից այս տարի ստացել են 31 մլրդ դոլար։ Ցուցանիշը 1/5-ով պակաս է անցած տարվա նույն ժամանակահատվածի ցուցանիշից՝ ըստ Dealogic-ի։ 2014 թվականին նման վարկառուները ստացել են ռեկորդային՝ 114 մլրդ դոլար։
Պարտատոմսերի վաճառքի անցած տարվա պիկը ավելի ռիսկային երկրներին թույլ է տալիս այժմ թողարկել պարտատոմսեր, քանի որ մրցակցությունը թույլ է՝ ասել է վերլուծաբանը։
Դա տեղի է ունենում Հայաստանի համար դժվարին շրջանում՝ հաշվի առնելով Ռուաստանի հետ նրա սերտ առևտրային հարաբերությունները։ J.P. Morgan-ի մասնագետ Ստեֆան Վեյլերի խոսքով՝ ամերիկյան աճող տոկոսադրույքների հեռանկարով և անորոշ շուկայական կանխատեսմամբ Հայաստանը խելամտորեն է գործել՝ մեծացնելով արտաքին ֆինանսավորումը։
Նշվում է, որ Հայաստանին իր պարտատոմսերի վաճառքի գործարքներում սպասարկում են Deutsche Bank-ը, HSBC-ն և J.P. Morgan-ը։
