Գերմանիայում ստեղծված PolitPlag կայքը կզբաղվի քաղաքական գործիչների թեզերում գրագողության տարրերի որոնմամբ: Նախաձեռնությունը Մարտին Հայդինգսֆելդերինն է: Նա համանման VroniPlag Wiki ինտերնետ-նախագծի հիմնադիրն է: VroniPlag Wiki-ն, ի տարբերություն նոր նախագծի, հետազոտում է գիտական աշխատանքները՝ առանց հեղինակի ընտրության:
VroniPlag Wiki-ի կրկնօրինակը ստեղծելու միտքը ծագել է տարբեր կուսակցությունների անդամների աշխատանքներում տեղ գտած գրագողության աղմկալի դեպքերի շարքի պատճառով: Բացահայտումները քաղաքական գործիչներին զրկել են գիտական աստիճաններից:
2013-ին երկրում կանցկացվեն Բունդեսթագի ընտրություններ: Հայդինգսֆելդերի կարծիքով՝ քաղաքացիները պետք է հասկանան, թե ում օգտին արժե քվեարկել:
Կայքի աշխատանքը կֆինանսավորվի քաղաքացիների կողմից: Ցանկացողները կարող են 20 եվրո ուղարկել կայքի հաշվին՝ նշելով, թե ում թեզն են ցանկանում ստուգել: Համակարգչային ծրագրի միջոցով հետազոտությունն արժե 50 եվրո: Գրագողության հայտնաբերված տարրերի ուսումնասիրության յուրաքանչյուր օրը կարող է արժենալ 500 եվրո: