Ադրբեջանի հարցով Եվրոպայի Խորհրդի մոնիթորինգային կոմիտեի զեկուցողներ Պեդրո Ագրամունտը և Ջոզեֆ Գրեշն անհանգստություն են արտահայտել Ադրբեջանում իրադարձությունների բացասական զարգացումների, ներառյալ խաղաղ ցուցարարների և ընդդիմադիր գործիչների ձերբակալությունների կապակցությամբ:
ԵԽԽՎ կայքում տեղադրված հայտարարության մեջ նշվում է, որ անհանգստացնող հաղորդագրություններ են ստացվում Ադրբեջանում ընթացող անարդար դատական գործընթացների և ձերբակալվածների հետ վատ վերաբերմունքի մասին:
Զեկուցողները Ադրբեջանի իշխանություններին կոչ են արել վերանայել ձերբակալված ցուցարարների գործերը մարդու իրավունքների չափանիշներին համապատասխան:
Նրանք առանձնակի ուշադրություն են դարձրել REAL շարժման ղեկավար Իլգար Մամեդովի և «Մուսավաթ» կուսակցության նախագահի տեղակալ Թոֆիք Յաղուբլուի ձերբակալության փաստին:
«Ցույցերից մի քանի օր հետո իրականացրած այս ձերբակալությունները լուրջ հիմք են տալիս կասկածելու դրանց օրինականության մեջ: Մենք Ադրբեջանի իշխանություններին վճռականորեն կոչ ենք անում կիրառել բոլոր օրինական միջոցները այս ընդդիմադիր գործիչներին ազատ արձակելու համար»,-նշել են զեկուցողները:
Նրանք հիշեցրել են նաև, որ Ադրբեջանը պետք է կատարի Եվրախորհուրդ մտնելուց առաջ ստանձնած իր պարտականությունները:
«Հանրահավաքների և խոսքի ազատությունը մարդու հիմնական իրավունքներն են, որոնք պետք է երաշխավորի Եվրախորհրդի ցանկացած անդամ պետություն»,- ընդգծել են նրանք:
