Մոսկվայում սպանված քրեական աշխարհի պատրիարք Ասլան Ուսոյանի (Դեդ Հասան) գողական կլանի մասնակիցները կազմել են նրա թշնամիների ցուցակը, որոնք կարող են առնչություն ունենալ նրա մահվանը. ցուցակում ներառվել է շուրջ 20 ազգանուն և գողական մականուններ, հաղորդում է «Իզվեստիա»-ն:
Թերթը, վկայակոչելով ՌԴ հատուկ ծառայությունների աղբյուրը, նշում է, որ առաջին ցուցակը հայտնվել է դեռևս անցած տարվա վերջին՝ մինչ Դեդ Հասանի մահը: Փաստացիորեն ցուցակը կազմել է հենց նա: Դա պատասխան էր ՝ ուղղված օրենքով գող Մերաբ Ջանգվելաձեի (Մերաբ Սուխումսկի), Ջեմալ Միքելաձեի (Ջեմո) և գողական աշխարհի ադրբեջանական թևի առաջնորդ Ռովշան Ջանիջի (Ռովշան Լենքորանսկի) դեմ: Նրանք Դուբայում կազմակերպել էին գողերի հանդիպում, որի ընթացքում թագադրել էին միանգամից 16 երիտասարդ հեղինակությունների:
Դեդ Հասանի պատասխանը եղել է այն, որ «դատապարտել է իր թշնամիների բոլոր սաներին», սակայն ժամանակ էր տվել նրանց՝ պայման դնելով, որ նրանք պետք է ապաշխարեն և դուրս գան Մերաբի, Ռովշանի և Ջեմոյի կլանից: Նրանց մի մասը, վախենալով, հենց այդպես էլ արել է:
Դեդ Հասանի սպանությունից հետո «ցուցակ 16»-ը ձևափոխվում է: Դրանում ներառվում են Հասանի թշանմիների անունները, որոնք, նրա կողմնակիցների կարծիքով, առնչվում են սպանության հետ: Ցուցակի առաջին տեղերը զբաղեցնում են Ռովշան Լենքորանսկին, նրա «աջ ձեռք» Ռուֆաթ Նասիբովը և Ջեմոն:
Հատուկ ծառայության տվյալներով՝ Դեդ Հասանի սպանության ենթադրյալ պատվիրատուներին և կատարողներին որոնելու և հաշվեհարդար տեսնելու համար արդեն ուղարկվել են վարձկաններ:
Աղբյուրի խոսքերով՝ Դեդ Հասանն ունեցել է մասնագիտացված վարձու մարդասպանների մի քանի խումբ, որոնք եղել են նախկին մարզիկներ, իրավապահ մարմինների աշխատակիցներ: Նրանք ամսական ստացել են 20 հազար դոլար և «պարգևատրում» յուրաքանչյուր կատարված «պատվերի» դիմաց:
Շատ հավանական է, որ հենց այս վարձկաններն են վերջերս սպանել օրենքով գող Ռովշանին: Ջեմոյին փաստացիորեն փրկել են իրավահ մարմինները՝ ձերբակալելով նրան: Ինչ վերաբերում է Ռուֆոյին, ապա հստակ տեղեկատվություն դեռևս չկա: Աղբյուրների մի մասը 100%-ով վստահ է, որ նա սպանվել է Մոսկվայում հունվարի 28-ին, իսկ մյուսները հերքում են դա:
Լրտեսները չեն բացառում, որ Ստամբուլում Ռովշանի դեմ մահափորձի կազմակերպման հարցում Դեդ Հասանի մարդկանց օգնել են քրդերը:
Ռուսաստանի հատուկ ծառայությունները դեռևս հստակ պատասխան չեն ստացել Թուրքիայում Ռովշան Ջանիջի դեմ մահափորձի հանգամանքների և նրա մահվան հաստատման վերաբերյալ:
ՌԴ հատուկ ծառայությունների աղբյուրը նշել է, որ իրենք գրեթե վստահ են, որ նա սպանվել է, և հավելել, որ Բաքվից հաղորդագրություններ են ստացվում, որ ողջ է, հանգստանում է Դուբայում և հեռախոսակապի մեջ է գնտվում հարազատների հետ:
