ՀԱՄԱՍ իսլամիստական շարժման առաջնորդ Խալեդ Մաշաալը հայտարարել է, որ Պաղեստինի ինքնավարության նախագահ Մահմուդ Աբասի հետ քննարկում է ազգային միասնության կառավարություն ձևավորելու հարցը,- հաղորդում է BBC-ն:
Մաշաալը նաև հայտարարել է, որ պաղեստինցիները սկսել են նախապատրաստվել նախագահական և խորհրդարանական ընտրություններին, որոնք հետաձգվում էին մի քանի տարի շարունակ ՀԱՄԱՍ-ի և Մահմուդ Աբասի ՖԱԹՀ կուսակցության միջև գոյություն ունեցող պառակտման պատճառով:
«Մենք գնում ենք հաշտեցման ուղիով»,- ասել է Մաշաալը:
Խոսելով ՀԱՄԱՍ-ի վաղեմի դաշնակից Սիրիայի մասին՝ Մաշաալը հաստատել է, որ կուսակցության շտաբ գրասենյակը ստիպված է եղել լքել Դամասկոսը ընդդիմության հետ անհամաձայնության պատճառով: Դրա հետ մեկտեղ, նա հավատացած է, որ Սիրիայի նախագահ Բաշար Ալ-Ասադը նախկինի պես աջակցում է ՀԱՄԱՍ-ին:
«Կասկած չկա, որ մենք համաձայն չենք այն բանի հետ, թե սիրիական վարչակարգն ինչպես է փորձում հաղթահարել ճգնաժամը»,- ասել է Մաշաալը և հավելել, որ ՀԱՄԱՍ-ը որոշ տարաձայնություններ է ունեցել նաև Իրանի հետ Սիրիայում տիրող իրավիճակի կապակցությամբ:
Նա նշել է, որ ՀԱՄԱՍ շարժումը, որին Իսրայելը, ԱՄՆ-ը և ԵՄ-ը համարում են ահաբեկչական կազմակերպություն, շահագրգռված է լավ հարաբերություններ հաստատելու արաբական բոլոր երկրների և մուսուլմանական հանրության հետ, ինչպես նաև շարժմանն աջակցող միջազգային հանրության հետ:
Հիշեցնենք, որ 2006 թ. ՀԱՄԱՍ-ը հաղթանակ է տարել խորհրդարանական ընտրություններում, ինչը հանգեցրել է ՖԱԹՀ-ի հետ հակամարտության: