Հայաստանում մենք, կոպիտ ասած, տեսնում ենք «քաղաքական անպտղաբերության որոշակի մակարդակ, ոչկոմպետենտություն, ոչլեգիտիմություն, և ունենք պարադոքսալ իրավիճակ, երբ անհրաժեշտ է ունենալ ավելի կայուն լեգիտիմություն, որը պետք է մյուս կողմից հավասարակշռվի ավելի մեծ կայունությամբ»: Այս մասին «Եվրանեսթ» Արևելյան գործընկերության խորհրդարանական վեհաժողովի քաղաքական, մարդու իրավունքների և ժողովրդավարության հարցերի մշտական հանձնաժողովիայսօր մեկնարկած նիստում ասաց Տարաշրջանային հետազոտությունների կենտրոնի տնօրեն Ռիչարդ Կիրակոսյանը:
Ռիչարդ Կիրակոսյանը նշեց, որ Հայաստանի 25 տարվա անկախությունը նշանակում է, որ այլևս չկան արդարացումներ թերացումների համար, Հայաստանն այլևս նորածին ժողովրդավարություն չէ, այլ հասել է արդեն չափահասության տարիքի՝ որպես պետություն:
«Այսինքն՝ այլևս չենք ընդունում արդարացումներ պաշտոնյաների շուրթերից: Բավական երկար ժամանակ քաղաքական ու տնտեսական դաշտում հայ ժողովուրդը զուրկ է եղել ընտրության հնարավորությունից, և սա պայմանավորված է եղել այն որոշումներով, որոնք ընդունել են բոլոր հայկական կառավարությունները: Այսօր այն որոշումները, որոնք կայացվում են, կարող են ազդել սերունդների վրա, որոնք դեռ գալու են: Մեր քաղաքական նախընտրությունը չպետք է կապված լինի որևէ քաղաքական գործչի հետ, այլ պետք է կապված լինի երկրի ապագայի հետ»,- ասաց նա: