Նախագահի թեկնածու Պարույր Հայրիկյանի որոշումները 5 օրվա մեջ մի քանի անգամ փոխվեցին: «Հրապարակը» գրում է, որ մահափորձից, ապա նաև իրեն այցելած Սերժ Սարգսյանի հետ հանդիպումից հետո Հայրիկյանն ասաց, որ ստիպված է օգտվել օրենքով իրեն ընձեռված երկշաբաթյա ժամկետից, ապա մի քանի անգամ մտքափոխ եղավ: Իսկ երեկ վերջապես հրապարակեց չարչրկված որոշումը՝ ՍԴ չի դիմելու:
Ավելի ուշ, անսպասելիորեն, ասուլիսին ներկայացավ նաև տուժածը: «Եկա ընդամենը ցույց տալու, որ ներկա եմ. թող ամեն հայ իմանա, որ ահաբեկչությունը հայ քաղաքական կյանքն իր բնականոն ուղուց չպետք է շեղի»,- ասաց Հայրիկյանը: Անդրադառնալով նախագահության որոշ թեկնածուների այն պնդումներին, թե իր ՍԴ չդիմելով նա փաստեց, որ գործարքի մեջ է մտել իշխանությունների հետ՝ արձագանքեց. «Ես բոլոր այդ թեկնածուներին ասում եմ՝ թող վերցնեն իրենց տարիքը, նայեն, թե էդ տարիքում Հայրիկյանն ինչով է զբաղված եղել, հետո նոր հիմարություններ դուրս տան»:
Հայրիկյանի որոշումը միանշանակ չընդունվեց: Թեկնածուներից առնվազն երեքը այն որակեցին «առևտուր իշխանությունների հետ»: Էպոսագետը դեռ նախորդ օրը հայտարարել էր, որ եթե Հայրիկյանը չդիմի ՍԴ, ապա ինքը կայրի իր մեքենան: Ավելի ուշ հայտարարեց, որ դա պատկերավորության համար է ասել և՝ «Հայրիկյանն իր պահվածքով ցույց տվեց, որ իմ մեքենան իրենից թանկ արժե»: Հրանտ Բագրատյանը, որ նախօրեին բավականին խիստ էր արտահայտվել, թե՝ եթե չդիմի ՍԴ, ուրեմն կատարվածը մահափորձ չէ, երեկ «Հրապարակի» հետ զրույցում միայն ափսոսանք հայտնեց Հայրիկյանի որոշման հետ կապված՝ ասելով, որ դա Հայրիկյանի որոշելիքն է: Րաֆֆի Հովհաննիսյանը նույնպես ասաց, որ դա Հայրիկյանի իրավունքն էր՝ դիմել, թե ոչ: Արամ Հարությունյանն ասաց. «Բայց արդյո՞ք նա այսօր է որոշում ընդունել, կամ ընդհանրապես ինքն է ընդունել այդ որոշումը, թե ոչ»: Իսկ Ձեր կարծիքով ո՞վ է որոշել՝ հետաքրքրվեց թերթը: «Չգիտեմ, բայց սա միակ դեպքն էր, որ Ահարոն Ադիբեկյանը ճիշտ էր ասում, որ նրա վարկանիշը հետո կիջնի: Ավելի ճիշտ կլիներ, որ ընտրությունները հետաձգվեին կամ, ավելի ճիշտ՝ նոր ընտրություններ անցկացվեին: Պետք է ժամանակ տրվեր, որ բացահայտեին մահափորձի հեղինակներին, նոր ընտրությունները լինեին»: Արման Մելիքյանն էլ, ով մինչ Հայրիկյանի որոշման հրապարակումը ասուլիսում ասել էր, որ եթե թեկնածուն չդիմի ընտրությունները հետաձգելու համար, ապա կփաստի, որ «ճնշումներ են եղել իշխանության շահերը պաշտպանող ինքնակոչների կողմից», երեկ «Հրապարակի» հետ զրույցում ասաց, որ իր կարծիքը չի փոխել և ավելացնելու ոչինչ չունի: Դե իսկ հացադուլավոր թեկնածուն՝ Անդրիաս Ղուկասյանն էլ առաջվա պես կարծում է, որ ընտրությունների շինծու գործընթացներ են, և Հայրիկյանի հետ տեղի ունեցածն այդ գործընթացների բաղկացուցիչն է: Ամեն դեպքում քաղաքագետները կանխատեսում են, որ Հայրիկյանի մահափորձը որևէ կերպ չի ազդի ընտրությունների վերջնական ելքի վրա, իսկ նրա վարկանիշի վերելքը կկասեցվի:
