Ծառուկյանը հետ է պահանջում իր միջոցներով ձեռք բերված կուսակցական գույքը

Գագիկ Ծառուկյանը ԲՀԿ շտաբներից այժմ պահանջում է վերադարձնել իր միջոցներով ձեռք բերված գույքը: Այս պահանջը բարկացրել և ավելի է հիասթափեցրել ԲՀԿ շտաբների աշխատակիցներին, քանի որ Ծառուկյանը կոնկրետ գույքի մասով շատ պահանջներ ներկայացնելու իրավունք չուներ:

ԲՀԿ տարածքային կառույցների աշխատակիցները նկատեցին, որ գույքը հիմնականում ձեռք են բերել տվյալ տարածքից ընտրված պատգամավորները:

Նոր Նորքի գրասենյակում մեզ տեղեկացրին, որ իրենցից գույքը ետ են պահանջել, բայց դեռ քննարկում են՝ ինչ պետք է վերադարձնեն։ Մեր հարցին՝ արդյոք հնարավո՞ր է առհասարակ գրասենյակը պահել, թե՞ փակվելու է, պատասխանեցին. «Մենք ոչինչ չգիտենք, չգիտենք՝ երբ ենք վերադարձնելու»:

Անորոշություն էր նաև Շենգավիթի ԲՀԿ տարածքային գրասենյակում։ Այստեղ ևս նշեցին, որ բացի գույքի վերաբերյալ մտահոգություններից՝ ավելի լուրջ մտահոգություններ ունեն. չգիտեն՝ գրասենյակը գործելո՞ւ է, թե՞ ոչ:

Դավիթաշենի գրասենյակը փակ էր:

Իսկ Աջափնյակի ԲՀԿ կենտրոնական գրասենյակի ղեկավար Դավիթ Թովմասյանը «Առաջին լրատվական»-ի հետ զրույցում նշեց, որ իրենց գույքը ձեռք է բերվել պատգամավոր Վահան Կարապետյանի միջոցներով, որը չի լքել ոչ խմբակցությունը, ոչ էլ կուսակցությունը. «Ես այստեղի պատասխանատուն եմ 2012թ.-ից, և այդ ժամանակվանից մինչև հիմա մենք գույք չենք ստացել, թե այդպիսի բան եղել է մինչ այդ՝ ես չգիտեմ, կդիմեն՝ կքննարկենք, կտեսնենք»,- ասաց նա:

 

Մանրամասները՝ տեսանյութում։