Իսրայելի վարչապետ Բինյամին Նեթանյահուն ԱՄՆ-ն զգուշացրել է Իրանի հետ միջուկային պայմանագիր չկնքել: Այս մասին նա հայտարարել է ԱՄՆ-ի Կոնգրեսում իր ելույթի ժամանակ, հաղորդում է Reuters գործակալությունը:
«Եթե Իրանը համաձայնի առաջարկված պայմաններին, ապա գործարքը չի կանխի Իրանի միջուկային զենքի մշակումը, այն միայն կերաշխավորի, որ Իրանը միջուկային զենք կստանա»,- ասել է Նեթանյահուն:
Նրա խոսքերով՝ Իրանի վրա, որի տնտեսությունը տուժել է նավթի գների անկման պատճառով, կարելի է ճնշում գործադնել, որպեսզի վերանայվեն ապագա համաձայնագրի պայմանները: Իսրայելցի քաղաքական գործիչը առաջարկում է Թեհրանից միջուկային ծրագրի վերաբերյալ ավելի լուրջ զիջումներ պահանջել՝ հրաժարվել ահաբեկչությանն աջակցելուց, Իսրայելի վերաբերյալ սպառնալիքներից և հարևան երկրների նկատմամբ ագրեսիայից:
Միայն եթե Իրանը կհամաձայնի այս պայմաններին, կարծում է Նեթանյահուն, կարելի է հանել Թեհրանի նկատմամբ պատժամիջոցները: Դրանից բացի, քաղաքական գործիչը հայտարարել է, որ Իրանը «միշտ Ամերիկայի թշնամին կլինի»:
Նեթանյահուն Կոնգրեսում ելույթ է ունեցել Ներկայացուցիչների պալատի խոսնակ Ջոն Բեյների հրավերով: Դա Սպիտակ տան վրդովմունքն է առաջացրել, որը նախապես տեղյակ չի եղել պատրաստվող ելույթի մասին: Դրանից բացի, Կոնգրեսում Դեմոկրատական կուսակցության 59 ներկայացուցիչներ բոյկոտել են Նեթանյահուի ելույթը:
