Ստամբուլի Սուլթանբեյիի թաղապետարանի կողմից այս տարի արդեն 3-րդ անգամ կազմակերպվում է «Միջազգային պոլսածաղկի պոեզիայի փառատոն», որտեղ որպես խորհրդանշան օգտագործվող քրքմածաղիկը հայտնաբերել է հայազգի բուսաբան, բժիշկ Գևորգ Վինսենտ Ազնավուրը: Այս մասին հայտնում է Թուրքիայում լույս տեսնող հայկական «Ակօս» շաբաթաթերթը։
Փառատոնը տեղի է ունենալու մարտի 5-7-ը, որին մասնակցելու են բանաստեղծներ՝ 10 երկրից: Արման Ավադարյանը գրել է Ազնավուրի՝ Թուրքիայում հայտնաբերած բազմատեսակ ծաղիկների պատմությունը:
Գևորգ Վինսենտ Ազնավուրը (1861-1920թթ.) ապրել և աշխատել է Ստամբուլում: Այժմ թաղված է Ստամբուլի Մեջիդիյեքյոյի հայկական գերեզմանատանը: Ազնավուրը բուսաբանության վերաբերյալ գրել է 19 գիրք, որոնցից ամենահայտնին ֆրանսերենով գրված «Ստամբուլի բուսական աշխարհը» ձեռագիր գիրքն է: Այն թուրքերեն է թարգմանվել գրվելուց միայն 48 տարի անց:
