Ազգությամբ հայ Նվարդ Բաքըրջըօղլուն մտադիր է քրդական Ժողովուրդների դեմոկրատական կուսակցությունից մասնակցել ամռանը Թուրքիայում կայանալիք խորհրդարանական ընտրություններին։ Այս մասին գրում է թուրքական «Դեմոկրատ Հաբեր» կայքը։
Բաքըրջըօղլուն, որն այս պահին ԺԴԿ-ի պատգամավորության թեկնածուների ցուցակում է, հայտարարել է, որ ցանկանում է առաջադրվել Ուրարտուի մայրաքաղաք Վանում:
«Հայոց ցեղասպանության 100-ամյա տարելիցին Թուրքիայի խորհրդարանական ընտրությունների արդյունքում պետք է հայ պատգամավորներ ընտրվեն։ Ցանկանում եմ թեկնածությունս առաջադրել Ուրարտուի մայրաքաղաք Վանում:
Մինչև Հայոց ցեղասպանությունը պատգամավորներ ենք ունեցել խորհրդարանում, սակայն վերջին 100 տարում Թուրքիայի խորհրդարանում հայեր չեն եղել (իրականում` Թուրքիայի Հանրապետության հռչակումից հետո Թուրքիայի խորհրդարանում մի քանի հայ պատգամավորներ եղել են – խմբ.)»,- ասել է Բաքըրջըօղլուն:
Նշենք, որ Թուրքիայի Ազգային մեծ ժողովի ընտրությունները նախանշված են հունիսի 7-ին: Արդեն հայտնի է, որ իշխող «Արդարություն և զարգացում» կուսակցությունը կարող է առաջադրել ազգությամբ հայ լրագրող Մարգար Եսայանի թեկնածությունը, որը ներկայումս աշխատում է իշխանամետ «Ենի Շաֆաք» պարբերականում:
Բացի դրանից՝ հայտնի է, որ ներկայիս Թուրքիայի հարավարևելյան Մարդին նահանգի Դերիք շրջանում բնակվող փոքրաթիվ հայերից մեկը՝ 58-ամյա Զեքերիա Սաբունջին, պաշտոնապես դիմել է քրդական Ժողովուրդների դեմոկրատական կուսակցությանը՝ որպես պատգամավորության թեկնածու գրանցվելու համար:
Այս կուսակցությանն են դիմել նաև Թուրքիայում գործող հայկական «Նոր զարթոնք» կազմակերպությունը և «Ժողովուրդների դեմոկրատական կուսակցության հայեր» խումբը՝ թեկնածուների ցուցակում իրենց մի քանի տեղ հատկացնելու պահանջով։
