Գերմանիայի կանցլեր Անգելա Մերկելը «նորմանական քառյակի» ներկայացուցիչներին հրավիրել է Բեռլին՝ ուկրաինական հարցը քննարկելու: Bloomberg-ի հաղորդմամբ՝ այս մասին նա հայտնել է մարտի 3-ի գիշերը 4 երկրների ղեկավարների միջև հեռախոսային խոսակցության արդյունքներով:
Մերկելի խոսքով՝ Ֆրանսիայի նախագահ Ֆրանսուա Օլանդի, Ուկրաինայի նախագահ Պյոտր Պորոշենկոյի ներկայացուցիչների, Մերկելի և Ռուսաստանի նախագահ Վլադիմիր Պուտինի մասնակցությամբ քառակողմ հանդիպումը պետք է տեղի ունենա Գերմանիայի մայրաքաղաքում մարտին:
Հեռախոսային խոսակցության ժամանակ 4 երկրների ղեկավարները հատկանշել են Ուկրաինայում իրավիճակի կարգավորման հարցում ձեռք բերված առաջընթացը: Բոլոր կողմերն ընդգծել են կրակի դադարեցման ռեժիմի խիստ պահպանման և ԵԱՀԿ-ի հսկողության տակ ծանր զենքերը հեռացնելու գործընթացը շարունակելու կարևորությունը, ասվում է Ռուսաստանի նախագահի մամլո ծառայության հաղորդագրության մեջ:
Մերկելը, Օլանդը, Պորոշենկոն և Պուտինը համաձայնվել են, որ պետք է մեծացնել ԵԱՀԿ-ի դերը: Կազմակերպության հատուկ մոնիթորինգային առաքելությանը խորհուրդ է տրվել ամեն օր հրապարակային տեղեկություն տրամարդել Մինսկի պայմանավորվածությունների կատարման ընթացքի մասին: Երկրների ղեկավարները նաև նպատակահարմար են համարել Կարմիր խաչի միջազգային կոմիտեին ավելի ակտիվորեն ներգրավել Դոնբասի բնակչությանը հումանիտար օգնություն ցուցաբերելու գործընթացին:
Հեռախոսազրույցի ընթացքում 3 նախագահներն ու կանցլերը նաև պայմանավորվել են, որ մարտի 6-ին տեղի կունենա 4 երկրների ԱԳՆ բարձրաստիճան ներկայացուցիչների հանդիպումն ուկրաինական հարցով:
Ուկրաինայի նախագահի մամլո ծառայության հաղորդմամբ՝ «զրուցակիցներն աջակցություն են հայտնել ուկրաինական առաջարկի առթիվ՝ ԵԱՀԿ դիտորդների տեղակայել կրակի դադարեցման ռեժիմի խախտման բոլոր կետերում, մասնավորապես, սկսել 10 բնակավայրերից՝ Սչաստյեից, Պոպասնայայից, Լուգանսկայա կայարանից, Կրիմիսկիյից, Ավդեևկայից, Վոլնովախայից, Գրանիտնոյեից, Լուգանսկոյեից, Շիրոկինոյից, Դոնեցկի օդանավակայանի շրջանից»:
