Ադրբեջանական APA լրատվական գործակալության փոխանցմամբ, Ադրբեջանի նախագահ Իլհամ Ալիևը, ելույթ ունենալով Բաքվում մեկնարկած Միջմշակութային երկխոսության շուրջ համաշխարհային ֆորումում, անդրադարձել է վերջին շրջանում Ադրբեջանի գրանցած հաջողություններին.
«Ադրբեջանը Իսլամական կոնֆերանս կազմակերպության (ԻԿԿ) անդամ է, և նախորդ տարի Բաքուն հայտարարվել էր իսլամական մշակույթի մայրաքաղաք: Մենք ակնկալում ենք, որ 2018 թվականին այդպիսի պատվի կարժանանա Նախիջևանը: Ադրբեջանում «տիրում» է ազգային ու կրոնական հանդուրժողականություն: Ազգային և կրոնական հողի վրա այստեղ «երբեք» ընդհարումներ չեն գրանցվել:
Մուսուլմանական երկների շարքում Ադրբեջանը բազմաթիվ հաջողություններ է գրանցել: Մուսուլմանական արևելքում կանայք առաջին անգամ ընտրական իրավունք են ձեռք բերել հենց Ադրբեջանում: Արևելքի առաջին օպերան գրվել է Ադրբեջանում: Ադրբեջանը նաև ԵԽ-ի անդամ է: Ադրբեջանը այն երկրներից մեկն է, որը կարող է միավորել Արևելքն ու Արևմուտքը, այդ երկու քաղաքակրթությունները»:
Հիշեցնենք, որ ներկայումս, բացի Եվրոպայի ու Ասիայի միջև էներգետիկ կամրջի դեր ստանձնելուց, Թուրքիան իրեն առաջարկում է նաեւ որպես երկու քաղաքակրթությունների` Արևմուտքի ու Արևելքի «հաշտարար»: Թուրքիան գտնում է, որ միայն ինքն է ի վիճակի հաշտեցնելու այդ երկու քաղաքակրթությունները, և ԵՄ-ին անդամակցելու ճանապարհին շարունակ թմբկահարում է այդ մասին:
TÜRKSAM միջազգային հարաբերությունների ու ռազմավարական հետազոտությունների կենտրոնի նախագահ Սինան Օղանի կարծիքով` Թուրքիան միակ երկիրն է, որը կարող է հավակնել Մերձավոր և Միջին Արևելքն արդիականացնողի դերին և ունակ է այդ տարածաշրջանը «հաշտեցնել» Արևմուտքի հետ։
Ստացվում է, որ Թուրքիան մտադիր է, Եվրոպայի ու Ասիայի միջև էներգետիկ ու քաղաքակրթական կամուրջների դեր ստանձնելով, դառնալ Եվրասիա մայրցամաքի առանցքային խաղացողը: