Վրաստանի արդարադատության նախարար Թեա Ծուլուկիանին ուրբաթ օրը հանդիպել է Ցամցխե Ջավախեթիի բնակիչների հետ՝ խոստացել, որ փուլ առ փուլ կլուծվի նրանց քաղաքացիությունը վերականգնելու գործընթացը:
Ավելի վաղ տեղեկացրել էինք, որ «Բազմազգ Վրաստան» քաղաքացիական նախաձեռնության տեղեկություններով՝ Վրաստանում քաղաքացիությունից զրկվել է մոտավորապես 3000 հայ՝ երկքաղաքացիություն ունենալու հիմնավորմամբ:
2014թ. սեպտեմբերի 1-ին Վրաստանում ուժի մեջ մտավ «Օտարերկրացիների և քաղաքացիություն չունեցողների իրավական դրույթների մասին» նոր օրենքը, որի համաձայն` 94 երկրների քաղաքացիներ, Վրաստանի տարածքում կարող են գտնվել ընդամենը 90 օր՝ 180 օրվա ժամանակաշրջանում:
Գաղտնիք չէ, որ 2008 թվականից հետո, երբ Վրաստանն ու Ռուսաստանը խզեցին դիվանագիտական հարաբերությունները և երկու երկրների միջև վիզային ռեժիմ սահմանվեց՝ Ջավախքում բնակվող և Վրաստանի քաղաքացիություն ունեցող շատ հայեր դիմեցին և ստացան նաև Հայաստանի քաղաքացիություն՝ անարգել Ռուսաստան մեկնելու ու աշխատելու համար:
Վերջիններս դեռ նախորդ տարվա սեպտեմբերից՝ միգրացիոն նոր օրենսդրության հաստատումից հետո ավտոմատ կերպով զրկվում են Վրաստանի քաղաքացիությունից՝ ունենալով միայն Հայաստանի քաղաքացիություն: Այսպիսով ընտանիքի մի մասը, ենթադրենք՝ կինը, երեխաները մնում են Վրաստանի քաղաքացի, իսկ ընտանիքի տղամարդը, որը դիմել և ստացել է Հայաստանի քաղաքացիություն՝ զրկվում է Վրաստանի քաղաքացիությունից ու կանգնում Վրաստանի տարածքը լքելու վտանգի առջև:
Վրաստանի արդարադատության նախարարի հետ ուրբաթ օրվա հանդիպումը բուռն քննարկումներով է անցել: Նախարարը մեղադրել է «Բազմազգ Վրաստան» քաղաքացիական նախաձեռնության ղեկավար Առնոլդ Ստեփանյանին՝ հայտարարելով, թե վերջիններս «գրանտ» ստանալով միտումնավոր մեծացնում են այն մարդկանց թիվը, ովքեր նման խնդիր ունեն:
Առնոլդ Ստեփանյանն «Առաջին լրատվական»-ի հետ զրույցում ասաց, որ Վրաստանի արդարադատության նախարարությունը լրջագույն սխալ է թույլ տվել՝ այդպես մասսայական կերպով Վրաստանի քաղաքացիությունից զրկելով հայերին, ադրբեջանցիներին, ազգային այլ փոքրամասնություններին. «Հիմա ակտիվ բողոքի ալիքից, պատգամավորների գործունեությունից հետո՝ խնդիրը սկսեց լուծում ստանալ: Արդյունքում արդեն կան փաստեր, որ Վրաստանի անձնագրեր են տրվում այն մարդկանց, ովքեր դրանից զրկվել են, իհարկե՝ առայժմ ոչ բոլորին»,- փոխանցեց մեր զրուցակիցը:
Ստեփանյանն ընդգծեց, որ որոշ դեպքերում տրվում է մշտական բնակության փաստաթուղթ: Նրա դիտարկմամբ՝ մոտ ապագայում կլուծվի բոլոր այն մարդկանց հարցը, ովքեր դիմել են իրենց քաղաքացիությունը վերականգնելու համար. «Կարծում եմ, նրանց խնդրանքը կբավարարվի, նման աղմուկ բարձրացնելուց հետո սայլը տեղից շարժվել է»:
Միևնույն ժամանակ Առնոլդ Ստեփանյանը հավելեց, որ Վրաստանի արդարադատության նախարարը նման խնդիր ունեցող մարդկանց թիվը փոքրացրել է: «Ուրբաթ օրը նախարարը շատ կոպիտ ձևով արձագանքեց մեր տվյալների հրապարակմանը, դուք այդ մասին արդեն գիտեք: Նա ասում է 350 մարդ է ընդամենը կորցրել քաղաքացիությունը, դա շատ քիչ է, մենք մինչև 3000 մարդ ենք հաշվել»,- եզրափակեց մեր զրուցակիցը: