«Առաջին լրատվական»-ի զրուցակիցն է ԱԺ ՀՀԿ խմբակցության պատգամավոր Լեռնիկ Ալեքսանյանը:
– Պարոն Ալեքսանյան, վերջին օրերին Հայաստանում ներքաղաքական իրադարձությունները շատ արագ զարգացան: Ձեր գնահատականը կատարվածին, մասնավորապես՝ Սերժ Սարգսյան-Գագիկ Ծառուկյան երկխոսությանը՝ նման կոշտ գնահատականներից և վիրավորանքներից հետո:
– Ընթանում էին այսօրվա իրավիճակին ոչ ադեկվատ պրոցեսներ, որոնք կարող էին երկրի անվտանգության հետ կապված խնդիրներ առաջացնել: ԲՀԿ-ի հետ հարաբերություններում հանրապետության նախագահի և ՀՀԿ-ի վերաբերմունքը և՛ ԲՀԿ-ի, և՛ Գագիկ Ծառուկյանի նկատմամբ շատ նորմալ է եղել՝ և քաղաքական, և մարդկային առումով: Բայց ԲՀԿ-ն, չլինելով արմատական ընդդիմություն, սակայն նրա վերջին գործողությունները մի քիչ զարմանալի էին, մի քիչ անհասկանալի: Եղել են դեպքեր, երբ ՀՀԿ-ականները կարող էին պատասխան տալ հիրավի և հանիրավի մեղադրանքներին, հայհոյախառն արտահայտություններին, որոնցից նույնիսկ արմատականներն էին զերծ մնում, հատկապես նախագահի հասցեին հնչեցված մեղադրանքներին: Նախագահն իրեն զսպում էր՝ հաշվի առնելով, որ դրանք իրավիճակային խնդիրներ են և կանցնեն:
– Այսինքն՝ Գագիկ Ծառուկյանը չափն անցե՞լ էր:
– Չափի մասին չասեմ, ինքը գիտի, բայց մեզ համար արդեն անընդունելի էր այդ կեցվածքը: Եվ կարծում եմ՝ այս մասին ասվել է, այստեղ խնդիրը հասցեագրված չէր Գագիկ Ծառուկյանին: Հասցեագրված էր նաև հասարակությանը: Ինչ-որ շրջան հանդուրժողականությունը շփոթում էին թուլության հետ, ասում էին՝ ՀՀԿ-ն հետ գնաց, զիջեց՝ հաշվի չառնելով, որ ՀՀԿ-ն եղել է խոսքի ազատության, ժողովրդավարության ջատագով, դրա համար էլ հանրահավաքների կազմակերպման հարցում առաջընթաց կա: Սա թուլության նշան դիտվեց: Եվ իշխանությունը ցույց տվեց, որ ներքաղաքական խնդիրները, քաղաքական տեխնոլոգիաները ընդունելի չեն այն ժամանակ, երբ դրանք կապվում են ազգի անվտանգության հետ:
Ավելին՝ տեսանյութում:
