Ինչպես արդեն տեղեկացրել ենք, «Սբ. Գրիգոր Լուսավորիչ» բ/կ–ում է գտնվում ՀՀ ԱԺ նախագահ Հովիկ Աբրահամյանը, ով տեսել է Պարույր Հայրիկյանին և խոսել է նրա հետ։ Ըստ նրա Հայրիկյանի վիճակը լավ է և իրենք կարճ զրուցել են։
Լրագրողների այն հարցին, թե ինչպես է, որ հարազատները պնդում են, թե Հայրիկյանն անգիտակից վիճակում է, իսկ պաշտոնյաները հակառակն են ասում, Հ. Աբրահամյանն ասաց, որ հարազատները ճիշտ չեն ասում։
ԱԺ նախագահը նաև ասաց, որ առաջիկա մի քանի օրերին պարզ կլինի ընտրությունները կհետաձգվեն, թե՝ ոչ։ Իր կարծիքով՝ դրա անհրաժեշտությունը չի լինի, քանի որ, ըստ բժիշկների, երբ գնդակը Հայրիկյանի մարմնից հանվի, նա արդեն կկարողանա քայլել։
Հ. Աբրահամյանն ասաց, որ Պ. Հայրիկյանը կորոշի ի վիճակի՞ է ինքը շարունակել քարոզարշավը, թե՝ ոչ։ Եթե գտնի որ իր վիճակը թույլ չի տալիս, օրենքի պահանջով ընտրությունները երկու շաբաթով կհետաձգվեն։ Սակայն ԱԺ նախագահը կրկնեց, որ իր կարծիքով՝ դրա անհրաժեշտությունը չի լինի։
Լրագրողների հարցին ի պատասխան՝ Հ. Աբրահամյանն ասաց, որ առայժմ որևէ մեկին չի կարող կասկածել։ Թե ում կողմից է կազմակերպվել այս ոճրագործությունը, կերևա քննության ընթացքում։
«Սա սադրանք է և ուղղված է մեր պետության դեմ»,–ասաց Հ. Աբրահամյանը։
