ԺԿ առաջնորդ Տիգրան Կարապետյանի այսօրվա ասուլիս հրավիրելու պատճառը կրկին ՀԱԿ-ն էր և վերջինիս հանրահավաքի մասին իրազեկող թռուցիկների բաժանումը:
Կարապետյանի համար հարցական է, թե ում դեմ է պայքարում ՀԱԿ-ը` Սերժ Սարգսյանի, թե՞ Ժառանգության, ԺԿ-ի կամ ՀՅԴ-ի: Վերջինիս Կարապետյանը բնորոշեց որպես իրական ընդդիմություն: Կարապետյանին մասնավորապես վրդովեցրել էր ՀԱԿ արտաքին հարաբերությունների հանձնաժողովի անդամ Դավիթ Շահնազարյանի երեկվա ասուլիսը:
«Ես զարմանում եմ` ինչպես կարող է բոլորին պրոյեկտ անվանել: Այստեղ հարց է ծագում, թե ով է ասողը` ազգային անվտանգության նախկին ղեկավարը, ում ղեկավարած կառույցի պադվալներում մարդիկ տառապել են: Ի՞նչ իրավունք ունեն նրանք որևէ մեկին վարկաբեկել` իրենք իսկ վարկաբեկված լինելով: Մեկը ԱԱԾ նախկին ղեկավար է, մյուսը` զինվորական դատախազ Գագիկ Ջհանգիրյանը, ում ստամոքսում տեղավորվել է հոկտեմբերի 27-ը: Այդ պատվավոր մարդիկ իրավունք չունեն անբիծ մարդկանց փնովելու»,- ասաց Տիգրան Կարապետյանը:
Նա նաև անդրադարձավ Ազատության հրապարակի նվաճմանը և նշեց, որ ՀԱԿ-ը չի նվաճել այն, այլ Րաֆֆի Հովհաննիսյանը: Կարապետյանը ասաց, որ հենց Ժողովրդական կուսակցության առաջարկներն են տեղաշարժ արձանագրում, ոչ թե ՀԱԿ-ը և որպես օրինակ բերեց գազի և ջրի սակագնի խնդիրների կարգավորումն և նշեց, թե այդ պահանջները երբ են առաջադրվել: