Եգիպտոսի առաջատար քաղաքական ուժերը պայմանավորվել են վերջ դնել անկարգություններին, որոնք տիրում են եկրում վերջին մի քանի օրերին, հաղորդում է ITAR-TASS-ը: Ինչպես հաղորդել է «Վաղը հեղափոխություն է» կուսակցության առաջնորդ Այման Նուրը, բռնությունից հրաժարվելու մասին փաստաթուղթը ստորագրվել է «Մուսուլման եղբայրներ» շարժման և Եգիպտոսի ընդդիմության ներկայացուցիչների՝ Ալ-Ազհար համալսարանում տեղի ունեցած հանդիպմանը: Հանդիպումը կայացել է շեյխ Ահմեդ Ալ-Թեյիբի նախաձեռնությամբ:
«Մեր հայրենիքն ապրում է ծայրահեղ բարդ ժամանակաշրջան և մենք պետք է ձգտենք ազգային երկխոսության հասարակության բոլոր շերտերի մասնակցությամբ առանց բացառության, որը միակ ուղին է վեճերի և տարաձայնությունների կարգավորման համար»,- ասել է Ալ-Թեյիբը:
Նրա խոսքերով` քաղաքական աշխատանքը չպետք է ընդհանուր որևէ բան ունենա բռնության և վանդալիզմի հետ, իսկ երկխոսությունը երաշխիք է իշխանության մոնոպոլիզացիայից, որը հանգեցնում է բռնապետության:
Հիշեցնենք, որ Եգիպտոսի մի շարք քաղաքներում զանգվածային անկարգությունները սկսվել են հունվարի 25-ից (հեղափոխության երկրորդ տարելից): Այս ընթացքում զոհվել է ավելի քան 50 մարդ:
