ԱԳ նախկին նախարար, ԲՀԿ-ական պատգամավոր Վարդան Օսկանյանի որդին` Արա Օսկանյանը, իր խոսքերով` «բետոնի գործ» է անում ու գումար է հավաքում` քաղաքականություն մտնելու համար:
Նշենք, որ երիտասարդ Օսկանյանը միջազգային հարաբերություններ է սովորել արտերկրի լավագույն բուհերից մեկում` ԱՄՆ Մասաչուսեթս նահանգի Tufts համալսարանում, սակայն փաստորեն այսօր փող է աշխատում «բետոն-ուզել» աշխատեցնելով: Արա Օսկանյանը մասնակցում էր «Սիվիլիթաս»-ի 5-ամյակին նվիրված զեկույցի շնորհանդեսին, ուստի մի քանի հարց ուղղեցինք նրան:
Հիշեցնենք նաև, որ հունվարի 4-ի երեկոյան «Էդեմ» ակումբի դիմաց ծեծկռտուք էր եղել, և Վարդան Օսկանյանի փոքր որդին` Արման Օսկանյանը, հրավիրվել էր ոստիկանություն` ցուցմունք տալու: Տուժածին քթի կոտրվածքով տեղափոխել էին «Նաիրի» բժշկական կենտրոն, որտեղ վերջինս ոստիկանությանը հայտնել էր, որ իրեն ծեծի են ենթարկել անհայտ անձինք: Ավելի ուշ ոստիկանությունը հայտարարեց, որ Վարդան Օսկանյանի որդին՝ Արման-Մինաս Օսկանյանը, վիճաբանության մասնակից չի եղել, այլ ուղղակի եղել է դեպքի վայրում և որպես վկա կանչվել է ոստիկանության բաժին՝ բացատրություն տալու:
– Արա, կուզենայի իմանալ` ի՞նչ նորություն կա այդ գործի քննությունից, նոր հարցաքննություն եղե՞լ է:
– Ճիշտն ասած, ես չեմ եղել, եղբայրս է եղել: Ինքն է ներկա եղել այդ բարում, որտեղ կռիվ է եղել, բայց ոչ ծեծողին է ճանաչել, ոչ ծեծվողին: Զուտ որպես վկա էին իրեն կանչել, լրատվամիջոցները շփոթել էին, թե ինքն է մասնակից եղել: Ընդհանուր նորություններին տեղյակ չեմ, որովհետև մեզ հետ կապված չէր էդ գործը: Որպես վկա էին կանչել՝ ասելու, թե ինչ է տեսել, ասել է` տեսել եմ, որ երկու հոգի կռվում էին: Իրենց պրոցեսն է ներկայացվել: Չորս աղջիկ էլ են եղել մի սեղանի շուրջը նստած, նրանց էլ են հրավիրել ոստիկանություն՝ վկայության: Ախպորս, իր ընկերուհուն էլ էին կանչել: Կասկադում է եղել, ես էնտեղ չեմ եղել:
– Իսկ կարելի՞ է իմանալ` Դուք ի՞նչ գործով եք զբաղվում հիմա:
– Բետոնի, ցեմենտի վաճառքով եմ զբաղվում: Բետոն-ուզել եմ աշխատեցնում շինարարության ոլորտում: «Միկա- ցեմենտ»-ի հետ աշխատում էի: Լրատվամիջոցները գրեցին, որ ես եմ վարձակալել «Միկա ցենետը», ընդհանրապես կապ չունի իրականության հետ, բայց հիմա քանի որ «Միկա ցեմենտը» փակ է, ցեմենտը «Արարատ-ցեմենտ»-ից եմ գնում: Ցեմենտը գնում ենք, օգտագործում ենք բետոնի մեջ: Բետոն ենք արտադրում:
– Եվ ինչպե՞ս է կոչվում Ձեր ընկերությունը:
– Էտի թերթերի մե՞ջ ա գրվելու, չեմ ուզում թերթի լույսի տակ ընկնենք:
– Ինչպե՞ս է ստացվել, որ Դուք չեք զբաղվում արտաքին քաղաքականությամբ, քաղաքականությամբ:
– Դեռ շուտ ա մի քիչ:
– Հիմա բետոնի գործի ժամանա՞կն է:
– Դե, հիմա գործով եմ փորձում զբաղվել, որ մի քիչ փող աշխատեմ:
– Որ մտնեք քաղաքականությո՞ւն:
– Քաղաքականությունը կա իմ սրտում: Միջազգային հարաբերությունները սովորել եմ:
– Ասել է թե` համոզված եք, որ պետք է փող աշխատեք, նո՞ր մտնեք քաղաքականություն, որ կարողանաք քաղաքականությամբ զբաղվել:
– Դե, պիտի փողով ապահովված լինես, որ քաղաքականության մեջ քո ծրագրերը, բաները առաջ տանես:
– Ձեր հայրը հայտարարում է, որ այսօր քաղաքական հետապնդում է իրականացվում իր դեմ, Դուք համաձա՞յն եք դրա հետ:
– Միանշանակ: Փողերի լվացում են կպցնում, բաներ են կպցնում, ինձնից լավ հորս թող մարդ չիմանա, ես գիտեմ` ինքը ինչ ձևի ա: Ազնիվ, մաքուր մարդ ա եղել, տասը տարի աշխատել ա: Ոչ մի առիթ, ոչ մի բան չի չարաշահել: Այդ առումով ուրիշ էդտեղ բան չկա հասկանալու, մենակ քաղաքական նպատակով է:
– Արդեն որոշե՞լ եք` ո՞ւմ եք ընտրելու նախագահի ընտրություններում:
– Ես չեմ կարա ընտրեմ, ցավոք սրտի, նոր եմ դիմել Հայաստանի քաղաքացի դառնալու համար:
Լուսանկարը՝ Արա Օսկանյանի ֆեյսբուքյան էջի