Թուրքական Zaman թերթի փոխանցմամբ, 4-ամյա պաշտոնավարությունից հետո շուտով կլրանա Անկարայում Իսրայելի դեսպան Գաբի Լևիի պաշտոնավարման ժամկետը, ինչից հետո ի հայտ կգա նոր դեսպանի նշանակման խնդիրը:
Իսրայելական կողմն այժմ մտահոգ է, որ Թուրքիան կմերժի նոր դեսպանի թեկնածության նշանակումը: Նշվում է, որ Գաբի Լևիի լիազորությունների ժամկետն ավարտվում է 3 ամիս անց:
Դեռևս նախորդ տարվա հոկտեմբերին իսրայելական արտգործնախարարության մի ներկայացուցիչ հայտնեց, որ իրենք նոր թեկնածու են որոնում Գաբի Լևիի փոխարեն, սակայն դրանից երկու շաբաթ անց Իսրայելի արտգործնախարությունը հրաժարվեց այդ գաղափարից: Այժմ չի բացառվում, որ Լևիի լիազորությունների ժամկետը կերկարաձգվի:
Հիշեցնենք, որ անցյալ տարվա օգոստոսին, երբ արդեն «Մավի Մարմարայի» միջադեպի կապակցությամբ կտրուկ սրվել էին թուրք-իսրայելական հարաբերությունները, Թուրքիայում ստորացրել էին Գաբի Լևիին: Թուրքիայի վարչապետ Էրդողանը Ռամադանի ավարտի կապակցությամբ ավանդաբար կազմակերպվող օտար դիվանագետների հետ հանդիպմանը չէր հրավիրել միայն Գաբի Լևիին:
