«Այժմ գործ ունենք ինչ-որ հեռացված, պատժված զինվորականների անհիմն մեղադրանքների և բամբասանքի հետ»,- «Առաջին լրատվական»-ի հետ զրույցում ասաց ՊՆ մամլո խոսնակ Արծրուն Հովհաննիսյանը՝ անդրադառնալով «Հրապարակ» թերթի այն հրապարակմանը, որում անանուն բարձրաստիճան սպաներ նշել էին, թե Ռազմական ինստիտուտում կուրսանտ Հայկազ Բարսեղյանի սպանության ամենամեծ մեղավորը նախարարն է:
Արծրուն Հովհաննիսյանը խորհուրդ տվեց այդ զինվորականին, ով մեղադրանք է հնչեցնում և իր մեղքը չի ընդունում, հիշել, թե դեպքից հետո ինչպես էին նախարարի դիմաց կանգնած խոսում իրենց պարտականությունների և անելիքների մասին, ինչ մակարդակով էին ներկայացնում դրանք: Արծրուն Հովհաննիսյանն ընդգծեց, որ մյուս կողմից գործ ունենք թերթի չճշտված, զգացմունքային և շահարկումների բնույթ ունեցող վերնագրի, մեղադրանքների հետ:
Անանուն զինվորականները նաև ընդգծել էին, որ 1 տարի առաջ ինստիտուտի պետի անձնակազմի հետ տարվող աշխատանքների գծով տեղակալի հաստիքը կրճատվեց, որը կանխարգելիչ դեր էր կատարում նման հանցանքների համար: Արծրուն Հովհաննիսյանը այս մասով ասաց. «Ըստ առարկայական՝ իրենց նշած պաշտոնը և պետի տեղակալն անցած տարի կային, ապա անցած սպանությունը ինչպե՞ս տեղի ունեցավ: Եվ ասեմ, որ էդ պաշտոնի վերացումից հետո այնտեղ գոյություն ունի նման երևույթների համար պատասխանատու մի ամբողջ բաժին, որոնք, ի դեպ, ևս պատժվել են: Այսինքն՝ եթե անձը չկա, կա աշխատանքային համակարգ»,- նկատեց Արծրուն Հովհաննիսյանը:
Նա ևս մեկ անգամ շեշտեց, որ արդեն իսկ պարզ է, թե հերյուրանքի հեղինակները ովքեր են, բայց պետք է հիշել մի պարզ բան. «Ուղղակի մարդիկ իրենց տեղում պիտի լինեին և իրենց պարտավորությունները կատարեին և ոչ թե բարեխղճորեն սպային վայել պատիժը կրելուց հետո անանուն բամբասանքներ տարածեն, որոշ մարդիկ էլ վերցնեն դրանք նյութ գրեն»,- եզրափակեց նա:
Լուսանկարը՝ Armenpress-ի
