Ռուսաստանում բնակվող վրացի հայտնի երգիչ Սոսո Պավլիաշվիլիին կասկածում են մանկության ընկեր ու Թբիլիսիում իր բիզնես-գործընկեր Ավտո Ադուաշվիլիի սպանությանն առնչություն ունենալու մեջ՝ գրում է «Գուրիա Նյուզը»:
Ինչպես պնդում է հոդվածագիր Էկա Ալփաձեն, սպանության մանրամասները իրեն ներկայացրել են գործարարի ընտանիքի անդամները:
Ալփաձեի խոսքով՝ սպանվածի ընտանիքի անդամը, չցանկանալով բացահայտել իր ինքնությունը, կասկածում է, որ սպանության մեջ խառնված է նաև Պավլիաշվիլին:
Առկա տեղեկությունների համաձայն՝ 2012-ի դեկտեմբերի 12-ին ձերբակալվել էր Սոսո Պավլիաշվիլիի քրոջ ամուսինը՝ Վախթանգ Չխապելիան, և ևս 3 մարդ, սակայն Վրաստանի ՆԳՆ-ն դեռ տեղեկություն չի տարածել ոչ ձերբակալվածների, ոչ սպանության դրդապատճառների մասին:
Դրա հետ կապված՝ «Ռուսթավի-2» հեռուստաընկերությունը կապվել է Պավլիաշվիլիի հետ, ով աբսուրդ է անվանել իր առնչությունը սպանությանը:
Ավտո Ադուաշվիլին գնդակահարվել է 2012-ի նոյեմբերի 23-ին՝ Թբիլիսիի Զազիաշվիլի փողոցում, սեփական ավտոմեքենայում:
