Հունվարի 17-ին Հայաստան ժամանած ԵԽԽՎ նախընտրական պատվիրակության հաղորդագրությանը, որտեղ նշվել էր, որ ՀՀ-ում տեղի ունենալիք նախագահական ընտրություններն արդեն խաթարվել են անտարբերության և անվստահության մթնոլորտի պատճառով, ըստ «Հայկական ժամանակի» ՀՀԿ-ական աղբյուրների, կարող է լուրջ հետք թողնել ԵԽԽվ հայաստանյան պատվիրակության ղեկավար Դավիթ Հարությունյանի հետագա կարիերայի վրա:
Նույն աղբյուրները հայտնում են, որ Սերժ Սարգսյանը, ում համար խիստ կարևոր է, որ փետրվարի 18-ի ընտրությունները անցնեն անաղմուկ և լավ տպավորություն թողնեն արևմուտքի վրա, չափազանց զայրացած է վերոնշյալ հայտարարությունից և մտադիր է նախագահի ընտրություններից հետո անձամբ զբաղվել ԵԽԽՎ հայաստանյան պատվիրակության կազմով: Խոսվում է նաև, որ ըստ ամենայնի, Դավիթ Հարությունյանը հրաժեշտ կտա իր այդ պոստին ևս և ընդհանրապես, պատվիրակության կազմում, հնարավոր է, փոփոխություններ լինեն: Ինքը, Դավիթ Հարությունյանը, հիշեցնենք, շտապեց հայտարարել, որ այդ հաղորդագրությունը շատ հեռու է օբյեկտիվ լինելուց: Երեկ, երբ «ՀԺ»-ն նրան ասաց, որ իր տեղեկություններով, ԵԽԽՎ դիտորդական առաքելության զեկույցը լուրջ խնդրո առարկա է դարձել իշխանական վերնախավում, և չի բացառվում, որ պատվիրակության ղեկավարը փոխվի, և հարցրեց՝ հնարավոր համարո՞ւմ եք դա, նա պատասխանեց. «Դա լուրջ քննարկման առարկա է դարձել այնտեղ, ոչ թե այստեղ, իսկ պատվիրակության կազմը փոխվելու հետ կապված՝ այս պահին որևէ քննարկում չկա, սակայն ես չեմ բացառում, որ կազմը ընթացքում փոխվի, իհարկե, միշտ էլ կարող է փոխվել, նման խնդիր չկա»: Ըստ Հարությունյանի, դիտորդական առաքելության հաղորդագրության վերաբերյալ դժգոհությունն ինքն ուղարկել է ոչ միայն պատվիրակության անդամներին, ովքեր տարածել էին մամուլի այդ հաղորդագրությունը, այլ նաև՝ ԵԽԽՎ գլխավոր քարտուղարին: Թերթի հարցին, թե ԵԽԽՎ-ում ի՞նչ մակարդակում է հարցը քննարկման առարկա դարձել, Հարությունյանը պատասխանեց. «Տարբեր մարմիններում»:
«ՀԺ»-ն փորձեց տեղեկությունների կապակցությամբ մեկնաբանություն ստանալ նաև ՀՀԿ խոսնակ, Աժ փոխնախագահ Էդուարդ Շարմազանովից: Հարցին՝ մեր տեղեկություններով, դիտորդական առաքելության հաղորդագրությունից հետո Դավիթ Հարությունյանից լուրջ դժգոհություններ կան, հնարավո՞ր է պատվիրակության ղեկավարը փոխվի, Շարմազանովը պատասխանեց. «Նման հարց չի քննարկվել»: Հարությունյանը, սակայն վերջին շրջանում մեկը մյուսի հետևից տապալումներ է արձանագրում: Հիշեցնենք, նա նախ տապալվեց Աժ էթիկայի հանձնաժողովում, որտեղից նրան հետ կանչեցին: Այնուհետև, եղավ ԵԽԽՎ դիտորդական առաքելության հայտարարությունը, որն ի սկզբանե մեծ ստվեր է գցում փետրվարի 18-ի ընտրությունների վրա, իսկ արդեն հունվարի 21-25-ը Ստրասբուրգում կայացած ԵԽԽՎ ձմեռային նստաշրջանի ընթացքում այլ անհաջողություններ ունեցավ: Ադրբեջանի հարցով համազեկուցող Պեդրո Ագրամունտը ԵԽԽՎ առջև Ադրբեջանի ստանձնած պարտավորությունների կատարման վերաբերյալ զեկույցի ներկայացման ժամանակ, հայտարարելով, որ Հայաստանն օկուպացրել է Ադրբեջանի տարածքների 20 տոկոսը, հավելել էր, որ սեպտեմբերի 4-ին Փարիզում մոնիտորինգի հանձնաժողովի նիստի ժամանակ հայկական պատվիրակության ղեկավարը ևս ընդունել է, որ Հայաստանն օկուպանտ է, բայց օկուպացրել է ադրբեջանական տարածքների ոչ թե 20, այլ 13 տոկոսը: Եվ ահա երեկ Հարությունյանը լրագրողներին փորձում էր համոզել, թե սա առաջին դեպքը չէ, երբ փորձ է արվում իր խոսքերն աղավաղել: «Նման դեպք, իսկապես տեղի է ունեցել սեպտեմբերին, երբ Ադրբեջանի համազեկուցողը և Ադրբեջանի պատվիրակության ղեկավարը փորձ արեցին աղավաղել իմ խոսքը, թե իբր, ես նման բան ասել եմ, որ դա տեղ գտավ նախնական արձանագրության մեջ: Մենք անմիջապես նկատեցինք դա, ներկայացրեցինք մեր առարկությունները և արձանագրությունը շտկվեց»,- ասաց Հարությունյանը:
Նա հեռվից ցուցադրեց մոնիտորինգի հանձնաժողովի արձանագրությունները և ասաց, թե չի կարող դրանք հրապարակել, քանի որ գաղտնի են: Իր ձեռքի թղթերից մեկից նա ընդամենը մի նախադասություն ընթերցեց. «Պարոն Հարությունյանը հերքեց օկուպացված տարածքներ հասկացությունը»: Նա ասում էր, թե պատահական չէ, որ լոբբիստական վճարովի աշխատանքը ԵԽԽՎ-ում վերջին տարիներին ծաղկել է: «Այս նստաշրջանը եկավ ապացուցելու, որ Վեհաժողովի անդամների մի զգալի մասը ղեկավարվում են բացարձակապես ոչ թե կազմակերպության արժեքներով, այլ շահերով (…):Ես չունեմ հստակ փաստեր, որոնք խոսեն կաշառքի մասին, ես ունեմ հստակ վերլուծական հնարավորություն ասելու, որ շատ տարօրինակ է, որ երբևէ ելույթ չունեցած պատգամավորները հայտնվում են դահլիճում և բոլորը միատեսակ ելույթ ունենում: Դա ինձ թույլ է տալիս հանգելու որոշակի եզրակացության»,- ասում էր Հարությունյանը: Երբ նրան ասացինք, որ իր ելույթներից տպավորությունն այնպիսին էր, որ ԵԽԽՎ-ում բոլորը կաշառված են, ինքն իսկապե՞ս այդպես է համարում, Հարությունյանը պատասխանեց. «Չէ, ես ամենևին կաշառված բառը չօգտագործեցի, բայց ես ասացի, որ հիմնական կազմը գտնվում է միատեսակ ազդեցության ներքո»: Ըստ էության, ստացվում է, որ կաշառված են՝ նկատառմանը արձագանքեց. «Ոչ, չի ստացվում, իմ խոսքում ես շատ ուշադիր եմ, զգույշ»:
