Ռուսաստանի ԿԲ նախագահը հայտարարել է, որ երկրում 2015 թ. գնաճը կարող է անցնել 15 տոկոսի սահմանը: Ըստ պաշտոնյայի՝ գնաճի գագաթնակետը լինելու է տարվա երկրորդ եռամսյակին: Նման գնաճը չի կարող բացասական ազդեցություն չունենալ Հայաստանի տնտեսության վրա:
Տնտեսագետ Վիլեն Խաչատրյանն «Առաջին լրատվական»-ի հետ զրույցում նշեց, որ Ռուսաստանի գնաճը կփոխանցվի և կազդի մեր ներքին շուկայի վրա, իսկ ներմուծվող ապրանքների գները նորից կթանկանան:
Նրա խոսքերով՝ Ռուսաստանում գնաճն այս պահին 12 տոկոս է, և տարվա երկրորդ եռամսյակի համար 15 տոկոսը միանգամայն իրատեսական ցուցանիշ է: Բացի 750 անուն ապրանքատեսակներից, որոնց ժամկետներն, ըստ Խաչատրյանի, հետաձգվել են, մյուս ապրանքների մասով գնաճը հայկական շուկայում անխուսափելի է: Սակայն քանի որ եվրոպական երկրների սանկցիաների մի մասը սեպտեմբերից չեն գործելու, մեր զրուցակիցը կարծում է, որ գները այդ ամսից սկսած կարող են իջնել:
«Երկնիշ գնաճ Ռուսաստանում անպայման կլինի, դեկտեմբերին 11.4 տոկոս էր, հունվարին 12.5 տոկոս և գնալով իրավիճակն ավելի է սրվում այդ երկրում: Մենք դրական ազդակներ չեն կարող սպասել ռուսական տնտեսությունից, գնալով այնտեղ խնդիրները շատանում են»,- հայտնեց մասնագետը:
Ինչ վերաբերում է տեղական շուկայում ռուսական ապրանքների ցածր գների պատճառով հայ արտադրողների խնդիրներին, Խաչատրյանը նշեց, որ որոշակի դժվարություններ այստեղ կանխատեսելի էին, պետք է մաքսային քաղաքականությունը վերանայվի:
«Եթե մրցունակ առևտրաշրջանառություն են ցանկանում, պետք է այդպիսի քաղաքականություն վարվի մաքսային ընդհանուր տարածքում, մի քանի ապրանքների գծով մաքսատուրքերի հետաձգումը հարցի լուծում չէ, հետագայում նորից խնդիրներ են առաջ գալու ներմուծվող ապրանքների գների հետ կապված»,- հայտնեց նա՝ նկատելով, որ մսամթերքի, թռչնամսի, հրուշակեղենի և այլ ապրանքատեսակների համար ներմուծվող ապրանքների պարագայում անմրցունակ գներ կլինեն, բացառությամբ հավկիթի, քանի, որ արտադրման ժամկետները տեղափոխման դեպքում լուրջ խնդիրներ կարող են ստեղծել:
Անդրադառնալով հայկական շուկայի գնաճին՝ վերջինս նշեց, որ ներմուծվող ապրանքների մասով 2014 թ. վերջին մենք ունեցել են 12 տոկոս աճ, իսկ գյուղատնտեսական ապրանքների մասով՝ 5 տոկոսից ավելի: Ըստ նրա՝ գնաճը մեղմող միակ քաղաքականությունը բանկերի կողմից վարկավորման կասեցումն է, որն, ըստ էության, խնդրի լուծում չէ. «Բանկերը տնտեսությունը սառեցրել են, քանի դեռ վարկավորում չկա՝ գնաճի մեծ ռիսկեր չկան: Բանկերը դեռ վախեցած են, դոլար-դրամի տատատման ռիսկը դեռ պահպանվում է»:
Տնտեսագետի կարծիքով, դեռ նախորդ ճգնաժամի ժամանակ, երբ Ռուսաստանում տնտեսական անկումը 7 տոկոս էր, Հայաստանում գրանցվեց 14 տոկոս. «Դա մոռանալ չենք կարող։ Եթե այնտեղ այս տարի տնտեսական անկումը 6 տոկոս լինի, չի բացառվում, որ Հայաստանի համար 6 տոկոս լինի»: ԱՊՀ-ի տարածքում հնարավոր է՝ տնտեսական անկումը 1.4 տոկոս լինի, մենք այս տարածում, ըստ մեր զրուցակցի, 33 տոկոս առևտրաշրջանառություն ունենք:
