ԱԺ ՀՅԴ խմբակցության ղեկավար Վահան Հովհաննիսյանը համոզված է, որ իշխանական ճամբարում ստրատեգիական տարբերություններ չկան:
«Միգուցե դա նրանից է, որ ստրատեգիա չկա»,- այսօր «Սիվիլիթաս» հիմնադրամի կազմակերպած «Հարյուր հարց, հարյուր պատասխան» քննարկման ժամանակ հայտարարեց նա: Փոխարենը, ըստ պարոն Հովհաննիսյանի, կան տակտիկական տարբերություններ, թե ինչպես պահել իշխանությունը:
Վ.Հովհաննիսյանը նաև ասաց, թե իշխանությունը միշտ ընկալվում է որպես տարերային աղետ, որից պետք է թաքնվել ու խուսափել: Ըստ նրա` հասարակական ընկալման մեջ իշխանություն լինելն ու իշխանությանը ծառայելը խարան է: «Մենք չենք խուսափում և չենք թաքցնում, որ իշխանություն ենք եղել: Ոչ մի կոմպլեքս չունենք»,- հայտարարեց նա` հավելելով, որ երբեք Դաշնակցության դիրքորոշումները չեն փոխվել, և ինչ իրենք ասել են դեռ 1995 թվականին, ասում են նաև այսօր:
«Տարբերությունը, միգուցե, նյուանսների մեջ է, բայց բովանդակային տարբերություն չկա»,- հայտարարեց պարոն Հովհաննիսյանը: Նա նաև հավելեց, որ առաջիկայում լույս կտեսնի գիրք, որտեղ կլինեն և՛ իր, և՛ ՀՅԴ ԳՄ ներկայացուցիչ Արմեն Ռուստամյանի ելույթները` 1995թ. սկսած: