Թուրքական իշխանությունները նախատեսում են Սիրիայի հետ սահմանին գտնվող Քիլիս քաղաքի հայկական ավերված եկեղեցու տեղում երեխաների կրթության կենտրոն կառուցել: Այս մասին հաղորդում է թուրքական «Հաբերլեր» լրատվական կայքը:
Թուրք-սիրիական սահմանից 10 կիլոմետր հեռավորության վրա գտնվող Քիլիս քաղաքի ինքնակառավարման մարմնի գույքային հաշվեկշռում գտնվող Սուրբ Հովհաննես հայկական եկեղեցու ավերակների տեղում կարող է երեխաների համար կրթական կենտրոն կառուցվել:
Եթե կառուցապատման նախագիծն արժանանա Թուրքիայի զարգացման նախարարության հավանությանը, եկեղեցու մնացորդներն ամբողջությամբ հողին կհավասարեցվեն: Հայտնի է, որ մինչ այժմ շինությունն օգտագործվել է «Թեքել» ընկերության կողմից և ծառայել իբրև խաղողի պահեստ:
Նշենք, որ այժմ ավելի քան 80 հազար բնակչություն ունեցող Քիլիսը ժամանակին ընդգրկված է եղել Օսմանյան կայսրության Հալեպի վիլայեթում և առանձնացել իր հայկական ու հրեական խոշոր համայնքներով:
Քիլիսի հայկական Սուրբ Հովհաննես եկեղեցու շինարարությունը սկսվել է 1856 թվականին և ավարտվել 16 տարի անց: Աղոթատեղին օծվել է 1873 թվականին: Այն ավերվել է 1925թ.-ին՝ թուրքական կառավարության անմիջական հրահանգով:
