Եվրահանձնաժողովը հավելյալ 100 մլն եվրո կհատկացնի սիրիացիներին մարդասիրական օգնության ցուցաբերման նպատակով: Օգնություն կտրամադրվի Սիրիայում բնակվողներին և փախստականներին: Այս մասին հայտնում է RIA Novosti-ն՝ հղում անելով Եվրահանձնաժողովի մարդասիրական օգնության հարցերով հանձնակատար Կրիստալինա Գեորգիևային:
«Էլ-Քուվեյթում առաջիկայում կայանալիք Սիրիայի միջազգային դոնորների կոնֆերանսին եվրոպացիների անունից ես կխոստանամ, որ ԵՄ-ն կառանձնացնի 100 մլն եվրո»,- Բրյուսելում լրագրողներին ասել է Գեորգիևան:
Եվրահանձնակատարի խոսքով՝ ԵՄ գործադիր իշխանությունը ավելի վաղ արդեն այդ նպատակի համար հատկացրել էր 100 մլն եվրո, իսկ Սիրիայի բնակչության համար եվրոպական ֆինանսական աջակցության ընդհանուր գումարը հասել է 360 միլիոն եվրոյի, ինչը կազմում է միջազգային հանրության կողմից ցուցաբերված ողջ մարդասիրական օգնության կեսը: Ֆինանսավորմանը մասնակցում են ԵՄ 27 երկրներից 23-ը:
Միջազգային գնահատականներով՝ Սիրիայում մարդասիրական օգնության կարիք ունի շուրջ 4 մլն մարդ, այդ թվում՝ 2 միլիոն տեղահանվածներն ու 700 հազար փախստականները:
