Իրանը լավ հարաբերություններ ունի Հայաստանի և Ադրբեջանի հետ, ինչը երկրի համար առավելություն է: Այս մասին Trend գործակալությանը տված հարցազրույցի ժամանակ հայտարարել է Ադրբեջանում Իրանի դեսպան Մոհսեն Փաքայինը:
Դեսպանի խոսքերով՝ դրա շնորհիվ Իրանն անհրաժեշտության դեպքում պատրաստ է միջնորդ դառնալ հակամարտությունը կանխելու և տարածաշրջանում խաղաղություն ապահովելու նպատակով:
Փաքայինի խոսքերով՝ Իրանը պատրաստ է միջնորդի դեր ստանձնել Լեռնային Ղարաբաղի հակամարտության խաղաղ կարգավորման գործընթացում: Դեսպանը նշել է, որ ԵԱՀԿ Մինսկի խմբի համանախագահները երկար տարիներ է՝ ջանք են գործադրում ԼՂ հակամարտությունը լուծելու համար:
«Մինսկի խմբի անդամ երկրները չեն ցանկանում հակամարտության լուծում և շահագրգռված են դրա ձգձգմամբ»,- հավելել է նա: Դեսպանի կարծիքով՝ ԼՂ հակամարտության կարգավորումն առաջնային չէ Մինսկի խմբի համար:
«Իրանը հակամարտության ձգձգումն օգտակար չի համարում տարածաշրջանի անվտանգության համար և այս տեսանկյունից ցանկանում է լինել միջնորդ տվյալ հարցում»,- հավելել է Փաքայինը:
Դեսպանի խոսքերով՝ հակամարտող կողմերի ցանկության դեպքում Իրանը պատրաստ է ստանձնել միջնորդի դեր և ներկայացնել հակամարտության լուծման նախագիծ:
