ԳԱԼԱ-ի փոխանցմամբ՝ Սառնաղբյուրի բնակիչ Մնացական Ալեքսանյանի հայրը այս պահին Շիրակի մարզի դատախազությունում է: Նա պահանջում է հանդիպում Շիրակի մարզի դատախազ Րաֆֆի Ասլանյանի հետ:
«Ես առայժմ ուզում եմ, որ նորմալ խոսենք, այս հարցը վերջանա, գնա: Եթե իմ հանդիպելուց հետո իմ տղային ազատ չարձակեն, ես հայտարարում եմ, որ այլեւս պատասխանատու չեմ ոչնչի համար եւ կդիմեմ բավականին կտրուկ միջոցների»,- ասել է Մ. Ալեքսանյանը:
Նա լրագրողների հետ զրույցում հայտարարել է, որ տղան ավելի շատ ցուցարարներին հանդարտեցնողներից մեկն է եղել, քան խռովարար, ուստի ըստ նրա անտրամաբանական է, թե ինչու են հենց որդուն ընտրել եւ ձերբակալել:
«Որդիս միտումնավոր է ընտրվել, ինքը Ասկերան ծառայած, երկու դիվերսիա հետ մղած, պարգեւատրված տղա է: Ես՝ ազատամարտիկ: Մենք ոչ մի վատ բան չենք արել, մեր պահանջն արդար է: Ամբողջ գյուղը ոտքի է ելել մեկ մարդու նման, ես եմ խնդրել, աղաչել, ժամանակավորապես լռեցրել, ու եկել են դատախազի հետ հանդիպելու: Եթե ինձ դրական պատասխան չտան եւ որդուս ազատ չարձակեն, ապա այլեւս ես ոչ մի բան ու ոչինչ չեմ զսպի»,- հայտարարեց Մնացականի հայրը:
Մանրամասները՝ ԳԱԼԱ-ում
