Մոսկվայի դեմ տնտեսական պատժամիջոցները և Կիևի զինումը վերջ չեն տա ուկրաինական ճգնաժամին, գրում է The Independent-ը: Թերթը նշում է, որ վերջին և լավագույն այլընտրանքը մնում է դիվանագիտությունը: Մի մարդ արդեն ծանոթ է երկու կողմերի հետ, և արդեն Ռուսաստանի ու Արևմուտքի հաշտեցման փորձ ունի: Նա ԽՍՀՄ նախկին նախագահ Միխայիլ Գորբաչովն է, նշում է պարբերականը:
Ուկրաինական ճգնաժամի յուրաքանչյուր փուլում Ռուսաստանի և Արևմուտքի կողմից գլխավոր խաղացողները «հրաշալի աշխատանք են արել» մեկը մյուսին ոչ ճիշտ մեկնաբանելու ուղղությամբ, և հիմա խաղաղ կարգավորման հեռանկարները թվում են հեռու, քան երբևէ, ասվում է հոդվածում: Հակամարտության ներկայիս վերջին սրման պատճառով Վաշինգտոնը և եվրոպական մայրաքաղաքները քննարկում են ուկրաինական բանակի զինման անհրաժեշտությունը, և այդպիսով արևմտյան մոտեցումը կարող է «կրկնակի» դառնալ, այսինքն՝ Մոսկվայի նկատմամբ տնտեսական պատժամիջոցներին կավելանա Կիևին ռազմական աջակցությունը, գրում է թերթը և հավելում, որ այդ միջոցներից ոչ մեկն արդյունք չի տա:
Պարբերականն ընդգծում է, որ արևմտյան քաղաքականությանն իսկապես պետք է «կրկնակի», բայց այլ մոտեցում: Նախ՝ ԱՄՆ-ը և Եվրոպան պետք է ուկրաինական տնտեսությանն աջակցեն տասնյակ միլիարդ դոլարներով, ոչ թե շատ ավելի փոքր գումարներով, ինչպես հիմա, երկրորդ՝ Արևմուտքը պետք է նոր ազդակ տա դիվանագիտական ջանքերին, ասվում է հոդվածում: Ենթադրվում է, որ Գորբաչովն ուզում է դեր խաղալ Ռուսաստանի և Արևմուտքի հաշտեցման գործում և մյուս ակնառու պետական գործիչներին համոզել նույնն անել, գրում է թերթը և դա անվանում է արժեքավոր նախաձեռնություն:
Գորբաչովը յուրահատուկ և բացառիկ կերպար է, նա «հակառակորդներին բանակցային սեղանի շուրջ նստեցնելու» իր կարողությունն ապացուցել է, բայց մենակ գլուխ չի հանի, գրում է պարբերականը: Թերթը եզրափակում է, որ դիվանագիտական ազդակ է պահանջվում արևմտյան ղեկավարների կողմից և հսկայական տնտեսական աջակցություն Կիևին:
