Բերձորում տեղի ունեցածին պետք է ամբողջական գնահատական տրվի, և շատ կարևոր է, որ մենք պատճառահետևանքային կապ տեսնենք տեղի ունեցած այդ միջադեպի առումով: Այս մասին մեզ հետ զրույցում նշեց ՀՀԿ խմբակցության պատգամավոր Կորյուն Նահապետյանը` անդրադառնալով Բերձորում Հիմնադիր խորհրդարանի ավտոերթի վրա հարձակման ու դաժան ծեծի դեպքին:
«Առաջին հերթին ուզում եմ անընդունելի համարել այն սադրանքը, որը կազմակերպվել էր Հիմնադիր խորհրդարանի կողմից: Նման ավտոերթ իրականացնելով, կարծում եմ՝ նախաձեռնողները ի սկզբանե հասկանում էին, թե այդ սադրանքը ինչ ազդեցություն կարող է ունենալ ԼՂՀ-ում: Եղել են նախնական արձագանքներ, որոնց պատասխանը շատ հստակ է, որ անընդունելի է եղել Արցախի մեծ մասի համար այն ակցիան, որ իրենք նախաձեռնել էին և փորձում էին իրականացնել:
Այդ իմաստով նախ պետք է գնահատական տրվի այդ ավտոերթին: Ես միանգամայն անընդունելի եմ համարում այն, ինչ նրանք նախաձեռնել էին և փորձում էին հրահրել մի իրավիճակ, որից հայ հասարակությունը օգուտ չէր քաղելու: Սրանում ես տեսնում եմ նաև դրսի հետ կապված տարբեր ծառայությունների հնարավոր մասնակցության հանգամանքը, որը նույնպես առաջացնում է մտահոգություն: Մենք պիտի դիտարկենք նաև մեր ազգային անվտանգության ապահովության տեսանկյունից բոլոր այն չարաբաստիկ նախաձեռնությունները, որոնք կարող են սպառնալիք ստեղծել մեր երկրի համար»,- ասաց Նահապետյանը:
Ինչ վերաբերում է այդ ավտոերթի արձագանքին, ապա, ըստ նրա, եղել է շատ կոշտ արձագանք: «Միջադեպի հետ կապված՝ Արցախի իրավասու մարմիններն իրականացնում են քննություն: Ծառայողական քննություն է իրականացվում նաև ոստիկանների գործողությունների իրավաչափության կամ համաչափության մասով: Քննության արդյունքներով միայն կարելի է գնահատական տալ, այդ թվում՝ քաղաքական գնահատական: Ես միայն կարող եմ ասել, որ բռնության ցանկացած դրսևորում անընդունելի է, ում կողմից էլ դա իրականացվի»,- ընդգծեց ՀՀԿ-ական պատգամավորը:
Դիտարկմանը, թե կարծիք կա, որ ԼՂՀ ոստիկանները չէին կարող իրենց նման բռնություն թույլ տալ, եթե չլիներ հրահանգ Բաղրամյան 26-ից, Կորյուն Նահապետյանը պատասխանեց. «Անընդունելի եմ համարում նման կապ տեսնելը կամ նման եզրահանգում անելը, որովհետև Արցախն անկախ պետություն է, և այդ պետության իրավասու մարմիններն իրենք են որոշումներ կայացնում, այդ թվում՝ հասարակական կարգի պահպանության մասով: Եթե ստեղծվել է մի իրավիճակ, որտեղ ոստիկանությունը պետք է համապատասխան քայլեր ձեռնարկի, ապա, բնականաբար, այդ քայլերը պիտի ձեռնարկվեն: Բայց այդ ամենը պետք է կատարվի օրենքի սահմաններում: Այդ առումով անհեթեթ է տեղի ունեցածը կապել Հայաստանի իշխանությունների հետ»:
