ԲՀԿ առաջնորդ Գագիկ Ծառուկյանը փետրվարի 5-ին իր անձնական նախաձեռնությամբ մեկնարկած քաղաքացիական-քաղաքական ներկայացուցչական համաժողովի ելույթում, ըստ էության, իր պահանջների ճանապարհային քարտեզն է ներկայացրել իշխանություններին: Գագիկ Ծառուկյանը հայտարարել է, որ առաջիկայում լինելու են հզոր հանրահավաքներ մարզերում և համապետական հանրահավաք Երևանում:
Սա, իհարկե, ըստ էության մեկ անգամ արդեն իսկ անցած փուլ է, սակայն նորը, ըստ ամենայնի, տարբերվելու է նրանով, որ Ծառուկյանը իշխանություններին հանրահավաքներից առաջ է ներկայացնում իր պահանջները, ըստ որում՝ երևի թե առավելագույնս պարզ ու հստակ, ինչպես երբևէ: Այդ պահանջներն են՝ կոալիցիոն իշխանություն հերթական ընտրությունների միջոցով: Հակառակ պարագայում ԲՀԿ առաջնորդը խոստանում կամ սպառնում է արտահերթ ընտրությունների պահանջով՝ հայտարարելով, որ այսօր լարվածության մեծ ռումբ կա պետության տակ, և բավական է մի անզույշ խոսք, որպեսզի ժողովուրդը դուրս գա փողոց: Այլ կերպ ասած՝ Ծառուկյանը հայտարարում է, որ ինքն է զսպում ժողովրդին փողոց դուրս գալու հարցում և, ըստ էության, չի անի դա, եթե իշխանությունները հստակորեն չպայմանավորվեն կոալիցիոն կառավարության հարցում:
Այդ հայտարարություններն իհարկե որոշակիորեն հակասության մեջ են ամբողջական իշխանափոխության մասին այն հայտարարությունների հետ, որ ԲՀ-ն հնչեցնում էր աշնանային փուլում: Եվ եթե այսօր մենք կարող ենք արձանագրել, որ կուսակցությունը կամ Գագիկ Ծառուկյանը հստակեցնում են իրենց պահանջը իշխանություններին և հստակեցնում են նաև սպառնալիքները՝ պահանջները չկատարելու դեպքում, ապա մյուս կողմից՝ սա կարող ենք դիտարկել նաև որոշակի նահանջ, կոմպրոմիսային հստակեցում աշնանային փուլի համեմատ, որտեղ ԲՀԿ-ն ամբողջական իշխանափոխության մասին էր խոսում:
Բացառված չէ, որ «Բարգավաճ Հայաստանը», հրաժարվելով ամբողջական իշխանափոխության մոտեցումներից և որդեգրելով կոալիցիոն իշխանության ձևավորման գաղափարը, իր կողմից, ըստ էության, զիջում է անում այդ նահանջի տեսքով՝ ակնկալելով, որ իշխանություններն էլ իրենց զիջումը կանեն և կգան կոալիցիոն պայմանավորվածության առաջիկա համապետական հերթական ընտրությունների համար:
Միևնույն ժամանակ, Ծառուկյանի ելույթում կարծեք թե ազդակները բազմանշանակ են, մասնավորապես, կապված նոր դեմքերով նոր թիմ ձևավորելու նրա հայտարարությունների հետ: Չենք կարող բացառել, որ Ծառուկյանն այս ազդակները ուղղում է նաև այն իմաստով, որ պատրաստ է վերանայել իր, այսպես ասած, այսօրվա թիմը, եթե իշխանություններն ընդունեն իր առաջարկները, և եթե ունեն խնդիրներ իր թիմում ներգրավված ինչ-ինչ դեմքերի կամ ուժերի մասով: Ըստ որում՝ այս համատեքստում ազդակը կարող է նաև վերաբերել երկրորդ նախագահ Ռոբերտ Քոչարյանի հետ ԲՀԿ-ի կապերին կամ ԲՀԿ-ի վրա Քոչարյանի ունեցած ազդեցության հետ կապված խնդիրներին, որոնք կհուզեն Սերժ Սարգսյանին, և Ծառուկյանը գուցեև հավաստիացնում է, որ նպատակ չունի հին դեմքերի վերադարձ ապահովելու:
Սրան զուգահեռ, սակայն, հավանական է նաև, որ սա ոչ թե Ծառուկյանի, այլ Քոչարյանի հավաստիացում է, որ եթե Սերժ Սարգսյանը համաձայնի կոալիցիայի առաջարկին, ապա ինքը պատրաստ է հրաժարվել անձնական իշխանական հավակնություններից:
Ծառուկյանի ելույթից հետո, ինչպես նա եզրափակեց ելույթը, գնդակը իրապես իշխանությունների դաշտում է, և շատ հետաքրքրական են լինելու արձագանքները այս դաշտից:
Լուսանկարը` PAN Photo-ի
