Կոտ դ’Իվուարի ճանաչված նախագահ Ալասանա Ուատտարայի կողմնակիցները սկսել են ինքնահռչակ նախագահ Լորան Գբագբոյի նստավայրի ու բունկերի գրոհը և պատրաստվում են ձերբակալել նրան: Այս մասին լրագրողների հետ հանդիպման ժամանակ հայտարարել է Ուատտարայի խոսնակը: «Այո, զինվորականները հիմա պատրաստվում են ուժով վերցնել նստավայրը և ձերբակալել Գբագբոյին, սակայն դա դեռ տեղի չի ունեցել»,- խոսնակի հայտարարությունն է փոխանցում Reuters գործակալությունը:
Ըստ France Presse գործակալության՝ զինվորականները հրաման են ստացել Գբագբոյին կենդանի թողել:
Հիշեցնենք, որ մի քանի օր առաջ Ուատտարայի կողմնակիցները գրավել են երկրի գրեթե ողջ տարածքը: Նրանք շրջափակել են երկրի տնտեսական մայրաքաղաք Աբիջանում գտնվող Գբագբոյի նստավայրը, որի բունկերում հիմա թաքնվում է ինքնահռչակ նախագահը: Երկու օր շարունակվող բանակցությունները, որոնց ընթացքում Գբագբոն հայտարարում էր, թե չի պատրաստվում հրաժարական տալ, այսօր առավոտյան ավարտվել են անարդյունք: