ԱՄՆ-ի բանակի առաջին կարգի շարքային Թեդ Դենիելսը մեկ վայրկյանում դարձել է հայտնի այն բանից հետո, երբ համացանցում հայտնվել է թալիբների դեմ մարտի՝ նրա մասնակցությամբ մի դրվագ: Բայց դրան հաջորդել է հիասթափությունը, քանի որ նման նյութը չի գովել ոչ զինվորական հրամանատարությունը, ոչ էլ ամերիկյան հանրության զգալի մասը:
Ամեն ինչ սկսվել է անցած ապրիլին, երբ Դենիելսի ստորաբաժանումը մարտեր էր մղում աֆղանական Կունար գավառում,- գրում է The Washington Post-ը: Ինչ-որ պահի ստորաբաժանման ամենատարեց զինվորը՝ 37-ամյա նախկին ոստիկանը, միացրել է տեսախցիկը, որը տեղակայված է եղել գլխարկի վրա: Նա երկար չի նկարահանել, բայց հասցրել է պատկերել մի զինվորի վիրավորվելու պահը, երբ նա օգնություն է խնդրել:
Դենիելսի իսկական խնդիրները սկսվել են ԱՄՆ վերադառնալուց մի քանի ամիս անց: Այդ ընթացքում նրա տեսագրությունը արդեն տարածվել էր համացանցում: Լրագրողները արդեն հասցրել էին ճշտել նրա անձը և լայնորեն շրջանառել էին այդ թեման: Ամերիկյան զորահրամանատարությունը ևս հայտնել է իր դժգոհությունը, քանի որ, ըստ նրանց, այդ տեսանյութը ոտնահարում է ամերիկյան բանակի պատիվը: