Ռուսաստանի վարչապետ Դմիտրի Մեդվեդևը կարծում է, որ այն բոլոր երկրները, որոնք ռազմական աջակցություն են ցույց տալիս Սիրիայում հակամարտող կողմերին, պետք է դադարեցնեն նման օգնություն և չխոչընդոտեն հակամարտության դիվանագիտական լուծմանը, հաղորդում է RIA Novosti-ն:
«Մենք պատրաստ ենք բոլորի հետ շփումների, սակայն կտրականապես դեմ ենք, որպեսզի այս կամ այն կողմը զենք մատակարարի կամ ընդդիմությանը, կամ որևէ այլ մեկին: Պետք է կանգ առնել»,- ասել է Մեդվեդևը Handelsblatt գերմանական թերթին տված հարցազրույցի ժամանակ:
Վարչապետն ընդգծել է, որ Սիրիայի վերաբերյալ Ռուսաստանի դիրքորոշումը «բացարձակ պրագմատիկ է»:
Մեդվեդևի խոսքերով՝ իրենք չեն սատարում ո՛չ Սիրիայի նախագահ Բաշար Ալ-Ասադին, ո՛չ ընդդիմադիրներին, այլ շփման մեջ են գտնվում Ալ-Ասադի և ընդդիմադիրների հետ:
«Մենք իսկապես ունենք միջպետական կապեր, կան տնտեսական և նույնիսկ ռազմական կապեր գործող կառավարության հետ, սակայն մենք երբեք չենք պնդել, որ Ալ-Ասադը կամ որևէ մեկ այլ ուրիշը պետք է մնա իշխանության գլուխ: Այդ հարցը պետք է որոշի սիրիացի ժողովուրդը»,- ասել է Մեդվեդևը:
Միևնույն ժամանակ, վարչապետը նշել է, որ Սիրիայում իրավիճակը չպետք է թողնել ինքնահոսի:
«Սիրիայում կան իսլամի այնքան կոնֆեսիաներ և ուղղություններ, որ եթե դրանք թողնվեն ինքնահոսի, դա կքայքայի երկիրը: Մենք կարո՞ղ ենք պատկերացնել, թե ինչ տեղի կունենա, եթե, օրինակ, այժմ իշխանության գլուխ գան նույն սուննիները: Ես կարծում եմ, որ նրանք մահապատժի կենթարկեն ալաուիներին, ինչքան էլ դա տխուր է»,- ասել է Մեդվեդևը և հավելել, որ պետք է պայամանվորածություն ձեռք բերել բանակցությունների սեղանի շուրջ, այդ թվում՝ երկրի ապագայի, ղեկավարության ճակատագրի վերաբերյալ, քանի որ դրանք երկրորդական հարցեր չեն:
