Լիբիայի կառավարական զորքերի կազմում կռվում են բելառուսական սպաներ: Նրանք չեն մասնակցում ռազմական գործողություններին, սակայն անընդհատ գտնվում են առաջին գծում և հանդես են գալիս իբրև խորհրդատուներ: Այս մասին այսօր գրել է Комсомольская правда թերթը:
Թերթի տվյալներով, Լիբիայում են գտնվում մի քանի հարյուր մասնագետներ Բելառուսից, որոնք ոչ մի առնչություն չունեն պաշտպանության նախարարության հետ, այլ կնքել են անհատական պայմանագրեր: Ոչ պաշտոնական տվյալներով, այդ մարդկանց ամսական աշխատարձը 3000 դոլար է:
Զինվորականների մի մասը մինչև պատերազմի սկսվելը պաշտոնապես հետ էին ուղարկվել Բելառուս։
Ռուս զինվորական մասնագետները վերջին տարիներին Լիբիայում չեն եղել: Մոսկվան բավարարվում էր այդ երկրին ռազմական տեխնիկա մատակարարելով:
Խորհրդային տարիներին ԽՍՀՄ-ը ակտիվորեն համագործակցում էր Լիբիայի հետ: Երկրում կային հարյուրավոր մասնագետներ, իսկ լիբիական բանակի սպաները հաճախ մեկնում էին Մոսկվա և Խորհրդային միության այլ քաղաքներ՝ ուսում ստանալու: Սակայն 1991 թվից հետո ակտիվ հարաբերությունները դադարեցին:
Պետք նշել, որ Լիբիայի կառավարությունն ու ընդդիմությունը բազմիցս մեղադրել են միմյանց վարձկաններ օգտագործելու մեջ: Բենղազիում պնդում են, որ Քադաֆիի բանակի մեծ մասը հյուսիսաֆրիկյան վարձկաններ են, որոնք մեծ գումարներ են ստանում, իսկ Տրիպոլիում հայտարարում են, որ ապստամբների մեջ կան «Ալ-Քաիդայի» շատ անդամներ, և նրանց մասնագիտական պատրաստվածությամբ զբաղվում են անձամբ ԱՄՆ-ի ԿՀՎ մասնագետները: Նյութերը՝ ըստ RBC-ի:
