Թուրքիայի փոխվարչապետ Բյուլենթ Արընչը թուրքական «Սաբահ» պարբերականի հետ զրույցում հերթական անգամ խոսել է նաև Ժնևում ՄԱԿ-ի Մարդու իրավունքների խորհրդի Համընդհանուր պարբերական դիտարկման աշխատանքային խմբի 21-րդ նստաշրջանում հայկական պատվիրակության ցուցաբերած դիրքորոշման վերաբերյալ։
Լրագրողի հարցին, թե այն փաստը, որ նիստի ընթացքում հայկական կողմը չի օգտագործել ցեղասպանություն եզրը և հիմնական շեշտադրումն արել է միջազգային համաձայնագրերի վրա, արդյոք նշանակո՞ւմ է, որ դա «դրական» քայլ է հայ-թուրքական հարաբերությունների կարգավորման տեսանկյունից, Արընչը պատասխանել է. «Թեև հայկական պատվիրակության խոսնակն օգտագործել է ցեղասպանություն բառը, սակայն դա արվել է որպես ընդհանուր հայտարարություն, և ոչ թե Թուրքիայի հասցեին ուղղված քննադատություն։ Հայկական պատվիրակությունը հայտնեց իր անհանգստությունը Հայաստանի շրջափակման կապակցությամբ՝ նշելով, որ անհրաժեշտ է դադարեցնել այն։ Մենք էլ, մեր հերթին, հայտնեցինք, որ նրանք իրենց ապրանքները երրորդ երկրներ արտահանելու համար կարող են օգտագործել Վրաստանի ու Իրանի, այնուհետև՝ նաև Թուրքիայի տարածքը, ինչպես նաև հիշեցրինք, որ Թուրքիայի և Հայաստանի միջև ուղիղ չվերթեր են գործում»։
Արընչը խոսել է նաև Հայոց ցեղասպանության 100-րդ տարելիցի վերաբերյալ. «Իհարկե, 2015 թվականի ապրիլի 24-ը շատ կարևոր է Հայաստանի և հայկական սփյուռքի համար։ Մենք գիտենք, որ Ցեղասպանության վերաբերյալ պնդումները հատկապես խրախուսվում են Սփյուռքի կողմից, մինչդեռ դրանք ոչ միշտ են հավանության արժանանում Հայաստանի իշխանությունների և ժողովրդի շրջանում։ Չեմ կարծում, որ երկկողմ հարաբերությունները կկարգավորվեն մինչև ապրիլ, քանի որ հնարավոր չէ նման ակնկալիքներ ունենալ, երբ տարիներ շարունակ այդ երկիրը հանդես է եկել տարաբնույթ պահանջներով, իսկ 2015-ին՝ 100-րդ տարելիցին, դրան հասնելն առավել ևս իրատեսական չէ։ Բայց, այնուամենայնիվ, ես հավատում եմ, որ ապագայում դրական զարգացումներ կլինեն»։
Հիշեցնենք, որ 1993 թվականին Թուրքիան միակողմանիորեն փակել է օդային և ցամաքային սահմանը Հայաստանի հետ, սակայն 2 տարի անց միջազգային հանրության ճնշման ներքո վերաբացել է օդային սահմանը։ Ինչ վերաբերում է ցայսօր փակ ցամաքային սահմանի վերաբացմանն ու դիվանագիտական հարաբերությունների հաստատմանը, Թուրքիան այս հարցում հանդես է գալիս նախապայմաններով՝ Հայաստանից պահանջելով Ադրբեջանին հանձնել ազատագրված տարածքները և հարգել Ադրբեջանի տարածքային ամբողջականությունը։
