Թեհրանի դատարանը քրիստոնյա հոգևորական Սայիդ Աբեդինին դատապարտել է 8 տարվա ազատազրկման՝ մեղավոր ճանաչելով բնակչությանն «ավետարանչականացնելու» մեջ։ Այս մասին հաղորդել է Ամերիկյան օրենքի և արդարադատության կենտրոնը։
Դատարանի կարծիքով՝ քարոզիչն ազգային անվտանգությանը սպառնալիք է ներկայացնում։ Նա իր ազատազրկումը կանցկացնի «Էվին» բանտում, որը հայտնի է խիստ պայմաններով։
2000-ականների սկզբին, երբ Իրանում վերացվել է տնային եկեղեցիների հանդեպ սահմանված արգելքը, հոգևորականը կազմակերպել է տնային «Աստծո տաճար»։ Սակայն հետագայում այդպիսի եկեղեցիները հայտարարվել են օրենքից դուրս և հոգևորականը ստեղծել է քրիստոնեական եկեղեցիների ցանց, որի միջոցով մուսուլմաններին քարոզել է դառնալ քրիստոնյա։
Իրանում արգելված է իսլամից այլ կրոնի անցնելը։ Շարիաթի օրենքներով՝ կրոնափոխը կարող է խուսափել մահապատժից, եթե խոստովանի հանցանքը և հրաժարվի նոր ընդունած դավանանքից։
