Չանաքքալեի նահանգապետարանը հանդես է եկել հայտարարությամբ, ըստ որի՝ Թուրքիայի քաղաքացիներին արգելվում է ապրիլի 24-ին և 25-ին այցելել Դարդանելի ճակատամարտին նվիրված Գալիպոլիի պատմական հուշարձան։
Թուրքական «Հաբերլեր» կայքը գրում է, որ Թուրքիայի ԱԳՆ-ի՝ Դարդանելի գործողությունների 100-րդ տարելիցի շրջանակներում իրականացվելիք միջոցառումների ժամանակացույցի հետ կապված ամոթալի միջադեպից հետո, երբ նրանում ընդգրկվել էր Ծիծեռնակաբերդի՝ Հայոց ցեղասպանության զոհերի հիշատակին նվիրված հուշարձանի լուսանկարը, հերթական սկանդալն է հասունանում։
Չանաքքալեի հաղթանակի 100-րդ տարելիցին նվիրված միջոցառումների շրջանակներում Թուրքիայի քաղաքացիները չեն կարող այցելել Գալիպոլիի հուշարձան, որի դռները մշտապես բաց են եղել այցելուների համար։ Նահանգապետարանն իր այս որոշումը պատճառաբանել է նրանով, որ այդ օրերին Թուրքիայում մեծաթիվ օտարերկրյա բարձրաստիճան պաշտոնյաներ ու պատվիրակություններ են լինելու, միջոցառումներին մասնակցելու է նաև նախագահ Ռեջեփ Թայիփ Էրդողանը։ Նշվում է, որ Թուրքիան հյուրեր է ընդունելու անգամ Ավստրալիայից և Նոր Զելանդիայից։
Հիշեցնենք, որ օրերս թուրքական մամուլում հրապարակվել է Ծիծեռնակաբերդի մի լուսանկար, որն ընդգրկվել է Թուրքիայի ԱԳՆ-ի պատրաստած Դարդանելի ճակատամարտի (հայտնի է նաև Չանաքքալեի, Գալիպոլիի պատերազմ) 100-րդ տարելիցի միջոցառումների ժամանակացույցում։ Սույն միջադեպը լուրջ իրարանցում է առաջացրել Թուրքիայի արտաքին քաղաքական գերատեսչության ներսում։ Հետաքննություն է կատարվում՝ պարզելու համար, թե ով է կանգնած կատարվածի հետևում։
