Կիրակի օրն ԱՄՆ-ում սկսվել է նավթային ոլորտի աշխատողների ամենախոշոր գործադուլը՝ 1980 թվականից ի վեր: Գործադուլին մասնակցում է նավթավերամշակման 9 խոշոր գործարանների 3.800 աշխատակից՝ հայտնում է TASS-ը:
Բողոքողները պահանջում են աշխատավարձի բարձրացում, արտաժամյա աշխատանքների սահմանափակում և ենթակապալառուների կողմից մրցակցությունից պաշտպանություն:
Ակցիան սկսելու մասին որոշումն ընդունել է Ամերիկայի մետալուրգիական արդյունաբերության աշխատողների միավորված արհմիությունը, որը ներկայացնում է նաև ավելի քան 230 ամերիկյան նավթավերամշակման գործարանների, նավթամուղների և քիմիական ձեռնարկությունների աշխատողների շահերը:
Հավաքական աշխատանքային պայմանագիրը, որի գործողության ժամկետը սպառվել է անցած կիրակի օրը, 3 տարով երկարաձգելու վերաբերյալ բանակցությունները սկսվել են դեռ հունվարի 21-ին և մինչ այժմ չեն ավարտվել: Շաբաթ օրն արհմիությունը մերժել է Royal Dutch Shell ընկերության առաջարկած պայմանագրի հինգերորդ տարբերակը, որը բանակցությունների ժամանակ ներկայացրել է նաև Exxon Mobil-ի և Chevron-ի շահերը:
Նավթավերամշակման գործարանները, որտեղ գործադուլ է սկսվել, պատկանում են LyondellBasell, Marathon Oil, Shell և Tesoro ընկերություններին: Ընդհանուր առմամբ նրանց բաժին է հասնում ԱՄՆ-ում նավթի վերամշակման 10%-ը: Մի շարք ձեռնարկություններում արդեն նվազել է արտադրության ծավալը:
ԶԼՄ-ները նշում են, որ եթե մոտ ժամանակներս չկնքվի նոր աշխատանքային պայմանագիր, գործադուլին կարող են միանալ բոլոր 63 նավթավերամշակման գործարանների աշխատակիցները, որոնց շահերը ներկայացնում է արհմիությունը: Նրանց բաժին է հասնում երկրում վերամշակվող նավթի 64%-ը:
Ըստ փորձագետների՝ ԱՄՆ-ում նավթային արդյունաբերության աշխատողների գործադուլը կարող է բերել համաշխարհային շուկաներում նավթի էժանացման: «Գործադուլի ընդլայնումը բացասական ազդեցություն կունենա նավթի արժեքի վրա: ԱՄՆ-ում արդյունահանվող նավթը պարզապես կավելանա»,- նշել է Fat Prophets թրեյդինգային ընկերության վերլուծաբան Դևիդ Լենոքսը:
