Իրականում ընդդիմադիր թեկնածուն ես եմ: Այսօր «Առաջին լրատվական»-ի հետ զրույցում ասաց «Ազգային համաձայնություն» կուսակցության ղեկավար, ՀՀ նախագահի թեկնածու Արամ Հարությունյանը՝ անդրադառնալով գալիք նախագահական ընտրությունների վերաբերյալ «Ազատ դեմոկրատներ» կուսակցության հայտարարությանը: Ըստ նրա՝ ընդդիմադիր թեկնածուն այն թեկնածուն է, որը պետք է ոչ միայն իր ձայների, էլեկտորատի շուրջ մտահոգվի, այլ իշխանությունից պետք է տարբերվի նրանով, որ կողմնակից լինի լեգիտիմ ընտրությունների:
«Իշխանությունները փոքր-ինչ չափն անցան, ուզում էին առաջադրվելու խոչընդոտներ ստեղծել: Այսօր ստացվում է, որ Հայաստանի ընդդիմադիր ուժերի հետագա քայլերը կախված են ընդամենը 6-7 մարդուց, եթե այս վեցը հանում են իրենց թեկնածությունները, երկրում ստեղծվումէ նոր իրավիճակ: Նոր ընտրություններ կլինեն, այդ դեպքում համոզված եմ, որ Հանրապետականը մեծամասնություն չի լինի, և կլինեն իսկապես մրցակցային ընտրություններ, երկիրը կգնա առաջ, քաղաքական մենաշնորհ չի լինի»,- տեսակետ հայտնեց Արամ Հարությունյանը:
Հիշեցնենք, որ «Ազատ դեմոկրատներ» կուսակցության լրատվական ծառայությունը տեղեկացրել էր, որ «Ազատ դեմոկրատներ» կուսակցության վարչությունը, հավատարիմ մնալով 2012թ. դեկտեմբերի 29-ի կուսակցության վարչության հայտարարությանը և քննարկելով փետրվարի 18-ին կայանալիք ՀՀ նախագահի ընտրություններին առաջադրված ընդդիմադիր թեկնածուների ծրագրերը, մոտեցումներն ու նպատակները, արձանագրում է, որ նրանցից որևէ մեկը բավարար չափով չեն արտահայտում և համահունչ չեն «Ազատ դեմոկրատներ» կուսակցության առաջ քաշած մոտեցումներին և սկզբունքներին:
Հաշվի առնելով վերոնշյալ փաստը՝ Ազատ դեմոկրատներ կուսակցության վարչությունը հայտարարում է, որ առաջադրված թեկնածուներից որևէ մեկին չի սատարելու:
Միևնույն ժամանակ, դեմ լինելով քաղաքական գործընթացները բոյկոտելու մոտեցմանը, կոչ է անում կուսակցության անդամներին և համակիրներին ակտիվորեն մասնակցել փետրվարի 18-ին կայանալիք նախագահի ընտրություններին և քվեարկել ընդդիմադիր թեկնածուների օգտին:
