Կառավարության վաղվա նիստում հաստատվելու են Հայաստանի Հանրապետության 2011/2012 ուսումնական տարվա առկա ուսուցմամբ ասպիրանտուրայի և դոկտորանտուրայի ընդունելության տեղերը: Նախատեսվում է պետական կրթաթոշակով, նպաստի ձևով ուսման վճարի փոխհատուցմամբ, առկա ուսուցմամբ՝ ասպիրանտուրայի 140 տեղ՝ պարտադիր զինվորական ծառայության զորակոչից տարկետման իրավունքով, նպաստի ձևով ուսման վճարի փոխհատուցմամբ, հեռակա ուսուցմամբ (առանց տարկետման իրավունքի)՝ 239 տեղ, դոկտորանտուրա ընդունելության տեղերը՝ պետական կրթաթոշակով, նպաստի ձևով ուսման վճարի փոխհատուցմամբ՝ 14 տեղ:
Նշենք, որ առկա ուսուցմամբ ասպիրանտական տեղերի քանակը այս տարի, նախորդ տարվա համեմատ, ավելի շատ է (նախորդ տարվա 122-ի փոխարեն, այս տարի 140 տեղ է): Եթե նախորդ տարի ԵՊՀ-ին հատկացված է եղել 28 տեղ, ապա այս տարի` 33 տեղ, էականորեն ավելացվել է Սլավոնական համալսարանի ասպիրանտական տեղերի քանակը` նախորդ տարվա 5-ի փոխարեն 15: Մյուս բուհերում տեղերի քանակը նախորդ տարվա համեմատ քիչ է փոխվել: Հիշեցնենք նաև, որ նախորդ տարի կրճատված ասպիրանտական տեղերի պատճառով ուսանողների շրջանում դժգոհություն էր առաջացել, ստեղծվել էր «Ուսման իրավունք» նախաձեռնությունը, որը մոտ մեկ ամիս բողոքի տարբեր ակցիաներ էր իրականացնում:
