Google Glass համակարգիչ-ակնոցները ոսկրային և հյուսվածքային հաղորդականության հիմքի վրա ձայն կփոխանցեն: Այդ միջոցի կիրառման շնորհիվ ձայնային ալիքները համակարգից անցնում են անմիջապես ներքին ականջ` շրջանցելով թմբկաթաղանթը: Ձայները կարող է լսել միայն օգտատերը, իսկ շրջաատի մարդիկ չեն կարող տարբերել դրանք, հաղորդում է Engadget տեխնոբլոգը:
Արտոնագրերի և առևտրային նշանների ամերիկյան բյուրոյի տվյալներով` Google-ը նշված տեխնոլոգիան նկարագրող հայցը ներկայացրել է 2011թ. հոկտեմբերին, իսկ հրապարակել 2013թ. հունվարի 23-ին: Հայցի նկարագրության մեջ ասվում է, որ ձայնն անմիջապես ականջ է հասնում ակնոցների շրջանակի մեջ ներկառուցված թրթիռային ցուցիչի շնորհիվ:
Նշվում է, որ այս դեպքում ձայնն ավելի հավասարակշռված է և փափուկ: Բացի դրանից՝ նման տեխնոլոգիան թույլ է տալիս զրուցակցին լսել նույնիսկ շատ աղմկոտ պայմաններում, օրինակ՝ փողոցում կամ կայարանում:
Հունվարի վերջին Google-ը միջոցառում կանցկացնի, որի ընթացքում մշակողները կարող են ծանոթանալ դրան և զբաղվել ծրագրային ապահովման մշակմամբ: Նախատեսվում է, որ Google Glass-ը զանգվածային շուկա կհանվի 2014-ից ոչ շուտ:
