Հունվարի 12-ին հանրությունը ցնցվեց Գյումրիում տեղի ունեցած ոճրագործությունից: Շատերի համար այն աննախադեպ էր, բայց 2000 թվականին ևս՝ այդ անգամ Վանաձորում, սպանդի էր ենթարկվել մի ամբողջ ընտանիք:
Armtimes.com-ը գրում է. «2000 թվականի հունվարի 28-ին անհայտ անձինք գիշերով ներխուժել էին Լոռու մարզի Վահագնի գյուղի բնակիչ Սերգեյ Կախյանի տուն և հրազենի գործադրմամբ, ավելի կոնկրետ՝ գլուխներին արձակված կրակոցներով, սպանել էին ե՛ւ նրան, ե՛ւ տանը գտնվող ընտանիքի մյուս վեց անդամներին: Ոճրագործները չէին խնայել անգամ նորածին երեխաներին: Հրազենից սպանվել էին 46-ամյա Սերյոժա Կախյանը, մայրը՝ 75-ամյա Մալուկ Կախյանը, կինը՝ 46-ամյա Անահիտ Ներսիսյանը, դուստրը՝ 25-ամյա Արևիկ Կախյանը, վերջինիս նորածին որդին, հարսը՝ 21-ամյա Կարինե Հարությունյանը և վերջինիս նորածին դուստրը: Սպանդից ողջ էին մնացել Սերյոժա Կախյանի որդին՝ Արմեն Կախյանը և մեծ դուստրը՝ Ալվարդը: Վերջինս ամուսնացած էր և առանձին էր ապրում, իսկ Արմեն Կախյանը ողջ էր մնացել միայն պատահականության բերումով և զուտ այն պատճառով, որ այդ օրը տանը չէր եղել։ Ավելի ճիշտ՝ ինչ-որ տեղից վերադառնալիս էր եղել և ուշ էր տուն հասել: Սպանդից հետո Վանաձորում տարբեր խոսակցություններ են եղել, վարկածներ, սակայն առավել քննարկվող վարկածներից մեկն այն էր, որ այս հանցագործությանը ինչ-որ ձևով առնչություն է ունեցել Վանաձորում հայտնի «հեղինակություն» Էդիկ Մարտիրոսյանը (առավել հայտնի է որպես Ճաճոյի Էդո):
Սպանված Սերյոժա Կախյանը Վանաձորի մեծահարուստներից մեկն է եղել: Նրան են պատկանել սննդի մի շարք օբյեկտներ՝ ռեստորան, խանութներ, հացի արտադրամաս, շուկա: Այն ժամանակ մամուլում գրվեց, որ Կախյանը ժամանակին առևտրական բնույթի ընդհանուր գործ կամ շփումներ է ունեցել Ճաճոյի Էդոյի հետ և այդ հողի վրա նրանց միջև լուրջ հակասություններ, տարաձայնություններ են եղել: Մեկ այլ խոսակցության համաձայն էլ, Վանաձորում Արմեն Կախյանի քենակալը ինչ-որ խնդիրներ է ունեցել: Այն ժամանակ Վանաձորում խոսակցություն էր պտտվում, որ իբր վերջինս Էդիկ Մարտիրոսյանի նկատմամբ անհաջող մահափորձ է կատարել՝ մեքենայի տակ ռումբ է տեղադրել, որն անսարքության պատճառով չի պայթել: Այնուամենայնիվ, վարկածը, որ հնարավոր է Էդիկ Մարտիրոսյանը կապ ունենար Կախյանների ընտանիքի 7 անդամների սպանդի հետ, ո՛չ հաստատվել և ո՛չ էլ հերքվել էր վարույթ իրականացնող մարմնի կողմից:
Այս խոսակցությունները նոր թափ առան, երբ 2004 թվականի օգոստոսի 3-ին սպանվեց Էդիկ Մարտիրոսյանը, նրա որդին և ազգականը. Վանաձորի մերձակայքում ավտոմատներից ու ատրճանակներից գնդակոծվել էր նրանց ավտոմեքենան: 2000 թվականի ոճրագործությունից որոշ ժամանակ հետո Արմեն Կախյանը հայտարարել էր, որ վրեժ է լուծելու այն անձանցից, ովքեր տարիներ առաջ սպանել էին իր ընտանիքի անդամներին, երեխային, կնոջը: Նա գրեթե համոզված էր, որ իր ընտանիքի անդամների սպանությունը կազմակերպել է Էդիկ Մարտիրոսյանը:
