ՀՀ ԿԳ նախարարությունը, ԱՄՆ ՄԶԳ հակակոռուպցիոն գործողությունների համախմբման ծրագիրը, ԵԱՀԿ երևանյան գրասենյակի հետ համատեղ, այսօր կազմակերպել էին «Բարձրագույն կրթության ոլորտում թափանցիկության և արդարության ավելացում» թեմայով հակակոռուպցիոն համաժողով, որին մասնակցում էին պատկան մարմինների ներկայացուցիչներ և Հայաստանում գործող բուհերի ռեկտորներ:
Հայաստանի կրթության ոլորտում կոռուպցիայի մակարդակի վերաբերյալ իրենց դիտարկումները ներկայացրին ԿԳ նախարար Արմեն Աշոտյանը, ԱՄՆ ՄԶԳ Հայաստանի առաքելության տնօրեն Ջաթինդեր Չիման և ԵԱՀԿ երևանյան գրասենյակի տնօրեն Սերգեյ Կապինիոսը:
Ջաթինդեր Չիման նշեց, որ շատ կարևոր է կրթության ոլորտում կոռուպցիայի վերացումը, որովհետև կոռուպցիայից զերծ կրթության ոլորտը Հայաստանի կայուն զարգացման հիմնասյունն է: Կրթության ոլորտում առկա կոռուպցիան անմիջականորեն ազդել է դասարանական ուսուցման որակի, ռեսուրսների արդյունավետ օգտագործման և գիտական աստիճանի կամ դիպլոմի արժեքի վրա:
Նախարար Աշոտյանն էլ իր ելույթում հանգամանորեն նշեց այն պատճառները, որոնք կոռուպցիայի են հանգեցնում կրթության ոլորտում:
