Ռուսաստանի Կենտրոնական ռազմական շրջանի հրամանատարությունը խստացրել է արտասահմանում տեղակայված միավորումներում և զորամասերում ծառայության թեկնածուների հանդեպ պահանջները: Այս մասին այսօր TASS-ին հայտնել է Կենտրոնական ռազմական շրջանի զորքերի հրամանատարի օգնական Յարոսլավ Ռոշչուպկինը:
«Նրանց համար խստացվել է կրթական ցենզը. հիմա արտասահմանում ծառայել կկարողանան այն թեկնածուները, ովքեր ունեն լիրաժեք միջնակարգից ոչ ցածր կրթություն, առավելություն կստանան բարձրագույն և միջին հատուկ ուսումնական հաստատությունների դիպլոմ ունեցողները»,- ասել է Ռոշչուպկինը:
Նրա խոսքով՝ բարձրացվել են նաև զինծառայողների առողջական վիճակի պահանջները, ավելի մեծ ուշադրություն է դարձվում պրոֆեսիոնալ հոգեբանական ընտրության թեստերի արդյունքներին: «Արտասահմանում արդեն չեն կարողանա ծառայել ալիմենտի, վարկերի և հարկային վճարումների պարտապանները: Անձնական գործի ձևակերպման համար անհրաժեշտ փաստաթղթերի ցանկում ավելացվել են լրացուցիչ հարցումներ իրավապահ մարմիններում և Թմրանյութերի վերահսկողության պետական տարաքծային ստորաբաժանումներում»,- հավելել է Ռոշչուպկինը:
Արտասահմանում տեղակայված Կենտրոնական ռազմական շրջանի միավորումներն ու զորամասերը կհամալրվեն միայն պայմանագրային զինծառայողներով: Ռոշչուպկինի խոսքով՝ ազատ պաշտոնների մրցույթը հասնում է մեկ տեղի համար 4 հոգու:
Արտասահմանում տեղակայված զորքերի առավել մանրակրկիտ ընտրության հարցը առավել արդիական է դարձել Գյումրիի ողբերգությունից հետո:
Հիշեցնենք, ըստ նախնական վարկածի՝ հունվարի 12-ին Ռուսաստանի 102-րդ ռազմաբազայի զինծառայող Վալերի Պերմյակովը Գյումրիում ներխուժել է Ավետիսյանների բնակարան և սպանել ընտանիքի 7 անդամներին:
