Մամուլի ազատությանն առնչվող ԵԽԽՎ-ի հրապարակած զեկույցը Թուրքիային քննադատել է` նկատելով, որ այդ երկրում մամուլն ազատ չէ: Զեկույցի համաձայն՝ ձերբակալված, կալանավորված կամ դատապարտված մեծաթիվ լրագրողներ կաթվածահար էֆեկտ ունեն մեդիա-շրջապատի վրա: Ներկայում երկիրն ունի ավելի մեծ թվով կալանքի տակ գտնվող լրագրողներ, քան աշխարհում որևէ այլ երկիր: Այս մասին հայտնում է Hurriyet Daily News-ը:
Զեկույցում ասվում է, որ 2012-ի ապրիլին 95 լրագրողներ սպասել են իրենց դատավճռին կամ դատապարտված են եղել: Նշվում է, որ այդ ժամանակից ի վեր այդ թիվը մեծացել է:
Մեծամասնությունը մեղադրվում է ահաբեկչության, բռնության ու ատելության հրահրման կամ Թուրքիայի պետական ինստիտուտները վիրավորելու մեջ:
Զեկույցում անդրադարձ է կատարվել 2007-ին թուրքահայ լրագրող Հրանտ Դինքի սպանությանը: Զեկույցում ասվում է, որ 2011 թվականին ազգայնական հայացքների տեր անձը 20 տարվա ազատազրկման է դատապարտվել Դինքին սպանելու համար, սակայն սպանության պատվիրատուները դեռևս դատապարտված չեն:
Զեկույցի ցուցակում Հայաստանը, Ադրբեջանը, Բելառուսը, Բուլղարիան, Հունաստանը, Հունգարիան, Իտալիան, Ռումինիան, Ռուսաստանը, Սերբիան, Մակեդոնիան, Ուկրաինան և Միացյալ Թագավորությունը ընդգրկված են որպես երկրներ, որտեղ առկա են մամուլի ազատությանը սպառնացող դեպքեր: