Ուկրաինական Podrobnosti.ua կայքը, վկայակոչելով վրացական Бизнес Грузии պարբերականը, հայտնում է, որ մարտի 28-ին Հայաստանը մի քանի ժամով ինտերնետից զրկվել էր 75-ամյա վրացուհու պատճառով:
Վերջինս Մցխեթի շրջանի Քսանի գյուղում պղինձ է փնտրել, սակայն փոխարենը վնասել է «Երկաթուղի տելեկոմ» ընկերությանը պատկանող օպտիկամանրաթելային մալուխային մագիստրալը: Դրա արդյունքում մարտի 28-ին ինտերնետից զրկվել էր ոչ միայն ամբողջ Հայաստանը, այլև` Վրաստանի մեծ մասը:
Տարեց կինն արդեն խոստովանել է իր մեղքը: Վրաստանի ներքին գործերի նախարարության մամլո ծառայության պետ Զուրաբ Գվենետաձեն հայտարարել է, որ դեպքից անմիջապես անց տարեց կինը ձերբակալվել է:
Այժմ նրա դեմ քրեական գործ է հարուցվել Վրաստանի քրեական օրենսգրքի 187-րդ հոդվածի 1-ին կետով (ուրիշի ունեցվածքի ոչնչացում կամ վնասում, որը ծանր հետևանքներ է առաջացրել): Տարեց վրացուհուն սպառնում է 1-3 տարվա ազատազրկում` Եվրոպայից Վրաստանի միջոցով դեպի Հայաստան ձգվող ինտերնետի մալուխը վնասելու համար, որը համարվում է «Երկաթուղի տելեկոմ» ընկերության սեփականությունը:
Նշվում է, որ տարեց վրացուհին հանցակիցներ չի ունեցել:
