Թուրքիայի արտգործնախարար Ահմեդ Դավութօղլուն Դավոսում Համաշխարհային տնտեսական համաժողովի շրջանակում մասնակցել է «Ժողովրդավարությունը կհաղթի՞» խորագրով հանդիպմանը: Այս մասին հայտնում է «Անադոլու» գործակալությունը:
Նիստին ելույթ ունենալով՝ Դավութօղլուն ասել է, որ «ժողովրդավարությունը կհաղթի, որովհետև դա պատմական գործընթաց է. ապագայում պատմությունը կդատի: Սառը պատերազմն ավարտվել է Եվրոպայում, իսկ հիմա՝ երկու տասնամյակ անց, այն ավարտվում է մեր տարածաշրջանում: Ժողովրդավարությունը կհաղթի վերջում»,- ասել է Դավութօղլուն:
«Եթե մենք այս հանդիպումն ունենայինք երկու տարի առաջ, ոչ ոք չէր կարող մտածել Թունիսում և Եգիպտոսում ժողովրդավարության մասին: Վերջին երկու տարիներին նրանք բավականին առաջընթաց են գրանցել: Բայց, իհարկե, երկար ճանապարհ կա ժողովրդավարության լիարժեք արմատավորման համար»,- ասել է Դավութօղլուն;
«Ես ուզում եմ օրինակ բերել իմ անձնական կյանքից: Իմ կրտսեր՝ 12-ամյա դուստրը եկավ իմ գրադարան և տեսավ իմ հին գրամեքենան և դրան նայեց որպես հնագիտական իրի: Ես իմ թեզն եմ գրել դրանով. այդ ժամանակ Մուբարաքը իշխանության ղեկին էր: Այնուհետև համակարգիչը եկավ, ներմուծվեց համացանցը, այնուհետև Facebook-ը. Մուբարաքը դեռ իշխանության ղեկին էր: Բայց երբ Twitter-ը եկավ, նա չկարողացավ դիմադրել: Հին ռեժիմները չեն վերադառնա»,-շեշտել է Դավութօղլուն:
«Արժանապատվությունը արաբական գարնան ամենակարևոր տարրն է,- ասել է Թուրքիայի արտգործնախարարը:- Ժողովրդավարությունը արժանապատվության որոնման ամենալավ համակարգն է: Մենք չպետք է հարցնենք՝ արդյոք արաբները կարո՞ղ են ժողովրդավարության հասնել: Ես կարող եմ Ձեզ վստահեցնել` արաբական և մուսուլմանական հասարակությունները կարող են ունենալ ժողովրդավարական համակարգի նույն մակարդակը»:
«Ղուրանի ուսմունքի հիմնական արժեքը մարդկային արժանապատվությունն է, որը ևս ժողովրդավարության հիմնական արժեք է: Դրանք չեն կարող հակասել միմյանց»,-ասել է Դավութօղլուն:
Հինգշաբթի Դավութօղլուն Դավոսում հանդիպել է Սոմալիի նախագահի, ՄԱԿ-ի գլխավոր քարտուղարի, Ալժիրի արտգործնախարարի, Ավստրալիայի արտգործնախարարի, Սիրիայի ընդդիմադիրների և հեղափոխական ուժերի ազգային կոալիցիայի նախագահի հետ:
Դավութօղլուն Պան Գի Մունի հետ քննարկել է կիպրական, սիրիական և իրաքյան խնդիրները և Թուրքիա-ՄԱԿ հարաբերությունները: